Փաստ ինֆո

ՀՀ վարչապետի պաշտոնակատար Նիկոլ Փաշինյանը կառավարության նիստի մեկնարկին մանրամասներ ներկայացրեց ադրբեջանցիների կողմից ՀՀ տարածքից 6 զինծառայողների գերեվարման հետ կապված։

Նիկոլ Փաշինյանը նշեց, որ Հայաստանի զինված ուժերի 6 զինծառայող ՀՀ ինքնիշխան տարածքում սահմանի կահավորման աշխատանքներ են իրականացրել, այդ թվում ականապատման աշխատանքներ, որոնք իրականացվել են զուգորդվելով զգուշացնող նշանների տեղադրմամբ. «Այսինքն դրանք ոչ թե արվել են դիվերսիոն նպատակներով, այլ ականապատում է իրականացվել զուգահեռաբար տեղադրվել են զգուշացնող նշաններ։ Այս գործողություններն իրականացվել են մեր սահմանի պաշտպանության մակարդակը բարձրացնելու նպատակով։ Հետագայում եղել է այն տեղեկատվությունը, որ մեր զինվորները գերեվարվել են։ Գերեվարման հանգամանքները դեռ պետք է պարզվեն, բայց մի բան հստակ է՝ դա ըստ էության գերեվարում չէ։ Տեղի է ունեցել մեր զինծառայողների առևանգում ՀՀ տարածքից»,-ասաց Նիկոլ Փաշինյանը։

Վերջինս նշեց, որ տեղի ունեցող գործընթացներն անընդունելի են. «Այս կարգի միջադեպերը տեղի են ունենում այն պատճառով, որ ոմանք ուզում են այնպես անել, որ մենք համակերպվենք մեր տարածքում ադրբեջանական ուժերի ներկայության հետ, ինչը տեղի ունենալ չի կարող։ Դեպքի առավել մանրամասն հանգամանքները կպարզվեն, բայց պետք է արձանագրել, որ դեպքը տեղի է ունեցել մեր տարածքում և 6 զինծառայողներն ունեցել են սահմանի կահավորման խնդիր, որը շարունակաբար տեղի է ունենում ամբողջ սահմանի երկայնքով և պետք է տեղի ունենա մեր սահմանների ամրապնդման տեսակետից։ Հարցն ամենևին չպետք է օգտագործվի ներքաղաքական նպատակներով, ընդ որում կարծում եմ՝ պետք է դատապարտել այս իրավիճակը բանակի և զինված ուժերի դեմ օգտագործելու բոլոր փորձերը, որովհետև բանակը կատարում է ՀՀ սահմանները պահպանելու իրենց գործառույթը։ Վերջին օրերին տեղի ունեցող միջադեպերն արձանագրում են, որ սա ամենևին սովորական իրադրություն չէ, սա Հայաստանի տարածքային ամբողջականությանը, ինքնիշխանությանը սպառնացող վտանգ է, որը միջազգային իրավունքի կոպտագույն խախտում է։ ՀՀ-ն պետք է օգտագործի բոլոր, այդ թվում միջազգային լծակները՝ իրադրությունը շտկելու և կարգավորելու համար»,-ասաց Նիկոլ Փաշինյանը։

Աղբյուր` Փաստինֆո