Փաստ ինֆո

Սյունիքի սահմանագիծը Իրանի համար առաջնահերթ նշանակություն ունի և այդ մասին խոսում է ոչ միայն Իրանի ԱԳՆ նախարարը, այլ նաև Իրանի Իսլամական Հանրապետության Ազգային Ժողովի ազգային անվտանգության և արտաքին քաղաքականության հանձնաժողովի նախագահ Մոջթաբա Զոլնուրի,- «Փաստինֆո»-ի հետ զրույցում արձանագրեց քաղաքագետ Սերգեյ Շաքարյանցը:

Նշենք, որ այսօր Հայաստան է ժամանել Իրանի ԱԳՆ նախարար Մոհամմադ Ջավադ Զարիֆը, որը հանդիպումներ է ունեցել ՀՀ ԱԳՆ նախարարի ժամանակավոր պաշտոնակատար Արա Այվազյանի և վարչապետի ժամանակավոր պաշտոնակատար Նիկոլ Փաշինյանի հետ, որի ժամանակ Զարիֆը հանդես է եկել բավականին ուշագրավ հայտարարությամբ։

«Մեղրիի ազատ տնտեսական գոտին, ինչպես նաև Իրան-Նախիջևան-Հայաստան երկաթգծի առկայությունը շատ արդյունավետ կարող է լինել երկու երկրների համար։ Լավ համաձայնություն է ձեռք բերվել։ Եվ հուսով եմ՝ առաջիկայում կկարողանանք ակտիվ ներկայություն ապահովել Սյունիքի մարզում: Սա այն կարևորությունն է, որ մենք տալիս ենք երկկողմ հարաբերություններին»,- Փաշինյանի հետ հանդիպման ժամանակ ասել է Զարիֆը։

Քաղաքագետ Սերգեյ Շաքարյանցի գնահատմամբ՝ այս հարցը շատ կարևոր է Իրանի համար։

«Հայաստանում չկան իշխանություններ, որոնք կարող են կազմակերպել սահմանների անխոցելիությունը, և Իրանն ունի բոլոր հիմքերը կասկածելու, որ ՀՀ-ն ի վիճակի է ապահովել հայ-իրանական սահմանի անվտանգությունը: Եվ որպեսզի թուրքերը չփորձեն սահմանի նաև այդ հատվածը օգտագործել Իրանի դեմ, ապա, բոլոր միջազգային նորմերի համաձայն, Թեհրանն ունի իրավունք՝ զորք մտցնել այն տարածքը, որը համարում է վտանգավոր», - նշել է Շաքարյանցը՝ ավելացնելով, որ նմանատիպ գործողություններ Իրանը իրականացրել էր Իրաքի հետ սահմանին, ինչպես նաև պարբերաբար գնդակոծում է Թուրքիայի հետ սահմանի այն տեղերը, որոնք համարվում է վտանգավոր:

«Այսինքն, եթե մեր պետությունն ի վիճակի չէ իր կողմից ապահովել սահմանի անվտանգությունը, ապա դա կանի Իրանը: Թեհրանին դրա համար մի բան է պետք, ստանալ Ռուսաստանի համաձայնությունը, որն իրենք կստանան: Այսպիսի ակնկալիք մենք էլ պետք է ունենք, քանի որ նախապատրաստվում է մի շարք ռազմավարական փաստաթղթերի ստորագրում և Իրանն ուզում է, որ այդ ծրագրերը իրագործվեն: Այս հարցում սահմանը կարևորագույն նշանակություն ունի», - նշել է Սերգեյ Շաքարյանցը:

Ըստ նրա՝ ոչ Հայաստանը, ոչ Իրանը իրականում շահագրգռված չեն Իրան-Նախիջևան-Հայաստան երկաթգծի շահագործմամբ: «Դա բխում է Ադրբեջանի և Թուրքիայի շահերից: Սակայն իրանական առաջարկությունը Պարսից Ծոցից մինչև Սև ծովի միջանցքը մեզ համար շատ շահավետ է: Եվ այդ նախագիծը պետք է իրականանա, շատ շուտով այդ միջանցքը կսկսի շահագործվել», - շեշտեց քաղաքագետը:

Հեղինակ՝ Անի Մշեցյան

Աղբյուր` Փաստինֆո