Փաստ ինֆո

Ադրբեջանը միայնակ չէր հանդգնի ագրեսիա կիրառել ՀՀ նկատմամբ։ Այսօր խորհրդարանում նման հայտարարությամբ է հանդես եկել ՀՀ վարչապետի պաշտոնակատար Նիկոլ Փաշինյանը։ Ըստ նրա՝ Ադրբեջանի Զինված ուժերի ստորաբաժանումները պետք է դուրս գան ՀՀ սահմանից անդին, այլ տարբերակ չկա, չի քննարկվում ու չի կարող քննարկվել։ Ադրբեջանն ըստ էության ագրեսիա է ձեռնարկել ՀՀ նկատմամբ, և նրա ագրեսիվ մտադրությունների վերաբերյալ պետք է տեղեկատվությունն ամենուր տարածվի։ 

«Ես չգիտեմ՝ ում հետ է համաձայնեցված այս ծրագիրը, ենթադրում եմ, որ Ադրբեջանը միայնակ չէր հանդգնի այսպիսի գործողություն իրականացնել։ Եվ ես կարծում եմ, որ այնուամենայնիվ ոմանց հետ նախապես համաձայնեցվել է այս ծրագիրը, բայց քանի որ կոնկրետություն չկա, մենք այդ ուղղություններով պետք է աշխատենք։ Եվ անհրաժեշտության դեպքում, երբ ունենանք հիմնավոր տեղեկություն, որ այս-այս միջազգային սուբյեկտների հետ այս ծրագիրը համաձայնեցված է, նաև պետք է մեր ժողովրդին բաց ու հրապարակային ասենք։ Գուցե մեր ժողովրդին պետք է բաց հրապարակային ասենք վերջին 3, 4, 7, 8, գուցե 10 տարվա իրադարձությունների մասին», հավելեց նա։

Փաշինյանն ասաց՝ չկա այնպիսի տարբերակ, որ հայկական կողմը որևէ փաստաթուղթ կստորագրի՝ առանց ՀՀ տարածքից ադրբեջանական զորքերի դուրսբերման։ Տեղեկացրեց, որ առաջարկվել է երկու տարբերակ՝ կամ զորքերը դուրս են բերվում, որից հետո տեղի է ունենում համաձայնեցված թղթի ստորագրումը, կամ ստորագրված թղթի մեջ հստակ ձևակերպվում է, թե քանի օրվա ընթացքում կամ ուր են դուրս գալիս Ադրբեջանի զորքերը։

«Դեռ այդ փաստաթուղթը չէր հրապարակվել, արտահոսք չէր եղել, մենք երկու գրավոր առաջարկ ենք ներկայացրել դրա վերաբերյալ՝ առաջինը գերիների ամբողջական վերադարձի վերաբերյալ, և երկրորդ տվել ենք կոորդինատներ, թե Ադրբեջանի զորքերը որ կոորդինատներից անդին պետք է լինեն։ Այդ պահից սկսած մեր առաջարկին մենք ոչ մի արձագանք չենք ստացել։ Այսինքն՝ այդ պահից սկսած որևէ նոր բան տեղի չի ունեցել։ Ես չգիտեմ՝ ինչքանով են դրա վրա ազդել մեր քննարկումները և դիրքորոշումը, բայց դա է եղել», ասաց Փաշինյանը։

Վերջինս հավելեց, որ առաջիկայում սպասվում է Պաշտպանության նախարարի այցը Ռուսաստան, հույս հայտնեց, որ որոշ հարցերի պատասխանը պետք է ստանանք և շարունակենք խորացնել մեր համագործակցությունը ՀԱՊԿ մեր գործընկերների և անվտանգության թիվ մեկ դաշնակից ՌԴ հետ։

Աղբյուր` Փաստինֆո