Փաստ ինֆո

Սև լճի տարածքում Ադրբեջանի ձեռնարկած գործողության նպատակը ռազմական բախում հրահրելն էր և ուժի գործադրմամբ միջանցք ստեղծելը՝ Սև լճից դեպի Բիչենեք տարածք: ԱԺ-ում  ասել է վարչապետի պաշտոնակատար Նիկոլ Փաշինյանը՝ պատասխանելով ադրբեջանական ագրեսիայի վերաբերյալ ԼՀ խմբակցության ղեկավար Էդմոն Մարուքյանի հարցին։

Փաշինյանը նկատեց, որ շատ է խոսվում այն մասին, որ Հայաստանի բանակը ուժային գործողություն չի կատարում, այլ դիմում է ՀԱՊԿ-ին։ Վարչապետի պաշտոնակատարը հիշեցրեց, որ ՀԱՊԿ-ը և այդ կազմակերպության անդամ երկրներն են ՀՀ-ին հորդորել՝ այս իրավիճակի հանգուցալուծմանը չգնալ ռազմական ճանապարհով։ Նա փորձեց իրավիճակն ավելի պատկերավոր օրինակով բացատրել.

«Ես անընդհատ ուզում եմ մի պատկերավոր օրինակ բերել՝ երբ շոգ է լինում, օդորակիչը միացնում են, ոնց որ ինչ-որ մեկն ասի՝ ինչո՞ւ պատուհանները չեք բացում, որ սկվազնյակ լինի, այլ՝ օդորակիչն եք միացնում։ Հետևաբար, տվյալ դեպքում ՀԱՊԿ-ում ՀՀ-ն ոչ թե հանդես է գալիս որպես խնդրարկու, այլ դա մի գործիք է, որ այդ երկրները միասին ստեղծել են՝ նմանատիպ իրավիճակներում օգտագործելու համար»,-ասաց Փաշինյանը՝ հավելեով, որ Հայաստանի ռազմական բախման կամ ռազմական լուծման չգնալը նաև նպատակ ունի ՀԱՊԿ անդամ երկրներին չներգրավել ռազմական գործողությունների մեջ։ 

Փաշինյանն ընդգծեց, որ այս պահի դրությամբ չի բացառում, որ Հայաստանը կգնա նաև ՄԱԿ-ի անվտանգության խորհուրդ դիմելու ճանապարհով։

«Ինչ վերաբերում է ՄԱԿ-ի անվտանգության խորհուրդ դիմելուն, այդ հարցը հենց առաջին օրերից էլ քննարկման առարկա եղել է, շարունակում է քննարկման առարկա լինել։ Այնտեղ ուղղակի կան նրբություններ, որ նման որոշումներ կայացնելիս պետք է որոշակի կանխատեսելիության տեսադաշտ ունենալ, այսպես ասած՝ նախապես նախապատրաստական աշխատանքներ իրականացնել։

Մենք երբեք չենք բացառել և չենք էլ բացառում, որ կգնանք այդ ճանապարհով, եթե պարզվի, որ ՀԱՊԿ-ի գործիքները կամ հայ-ռուսական միացյալ զորախմբի գործիքները բավարար չեն այս իրավիճակը և խնդիրը լուծելու համար»,- հայտարարեց Փաշինյանը։

Աղբյուր` Փաստինֆո