Փաստ ինֆո

Գեղարքունիքում տեղի ունեցած զարգացումները, ցավոք սրտի, սպասելի էին: Այս մասին «Փաստինֆո»-ի հետ զրույցում ասաց ռազմական վերլուծաբան, «Ռազմինֆո» մասնագիտական կայքի համակարգող Կարեն Վրթանեսյանը:

Նշենք, որ այսօր ժամը 14.20-ի սահմաններում, Ադրբեջանի Հանրապետության զինված ուժերի մի խումբ զինված զինծառայողներ՝ իրենց հրամանատարների կազմակերպմամբ, առանց թույլտվության, ապօրինի հատել են ՀՀ Գեղարքունիքի մարզի Վարդենիս համայնքի վարչական տարածքում գտնվող Վերին Շորժա բնակավայրի սահմանային հատվածում պահպանվող ՀՀ պետական սահմանը և ունենալով ՀՀ տարածքային ամբողջականությունը խախտելու դիտավորություն՝ բռնության կոչեր են հնչեցրել այդ հատվածում պահպանություն իրականացնող ՀՀ ԶՈՒ-ի զինծառայողների նկատմամբ, պահանջել են դիմադրություն ցույց չտալ ու ազատել տարածքը:

Առաջացած վիճաբանության ընթացքում նրանք դիտավորությամբ կրակահերթեր են արձակել ՀՀ ԶՈՒ զինծառայողների ուղղությամբ, որի արդյունքում ՀՀ ՊՆ N զորամասի պայմանագրային զինծառայող, կրտսեր սերժանտ` 1989թ. ծնված Գ. Խուրշուդյանը որովայնի շրջանում ստացել է հրազենային վիրավորում: Զինծառայողը տեղափոխվել է Գեղարքունիքի կայազորային հոսպիտալ, որտեղ արձանագրվել է նրա կենսաբանական մահը:

«Ես չգիտեմ, եղել է այնտեղ հստակ պայմանավորվածություն, թե ոչ, բայց երբ դու առանց կրակոցի թշնամուն թողնում ես մտնել քո տարածք, ապա ինչ-որ պահից թշնամին խախտելու է պայմանավորվածությունները, եթե դրանք եղել են: Թշնամին տեսնելով ՀՀ իշխանությունների կրավորական դիրքը, հաշվի չի նստելու հայկական կողմի հետ»,- շեշտեց փորձագետը:

Նրա արձանագրմամբ՝ այս թշնամին որևէ պայմանավորվածության հետ հաշվի չի նստում, ունի հարուստ պատմություն՝ էսկալացիաներ հրահրելու։ Որպես օրինակ բանախոսը նշել է ուղղաթիռ խոցելու դեպքը, ապրիլյան պատերազմը: «Այսպիսի քայլերի Ադրբեջանը փորձում է առաջինը գնալ, որպեսզի անսպասելիությամբ հասնի արդյունքների»,- նշել է Կ.Վրթանեսյանն ու ավելացրել. «Սա իմանալով ակնհայտ էր, որ ինչ-որ պահից թշնամու զորքը անցնելու է էսկալացիայի նոր փուլին»:

Ըստ նրա՝ այս պահին ՀՀ իշխանությունները չեն գնա իրավիճակի սրացման, ավելի շուտ բողոքելու են ռուսական կողմին, լինելու է զանգ Պուտինին և այլն:

«Գնալով ավելի ու ավելի դժվար է լինելու հակառակորդին մեր տարածքից հանել, քանի որ այդ բանակցությունները, որոնց մասին իշխանությունները հայտնում էին և ինչ-որ հույսեր էին տալիս, որ մոտակա օրերին թշնամու զորքերը դուրս են գալու, պետք էր Ադրբեջանին ամրանալու համար այս դիրքերում, որպեսզի հասցնեն այնտեղ նոր զինուժ և տեխնիկա մոտեցնել: Մեր սահմանը մի գուցե չեն անցել, բայց մոտակայքում իրենց զորքերն են տեղակայում, որպեսզի սրման դեպքում կարողանան աջակցություն ցույց տալ իրենց զորքին», - նկատեց փորձագետը:

Նրա խոսքերով՝ սա շատ պրիմիտիվ խաղ էր Ադրբեջանի կողմից, որը Հայաստանի իշխանությունները, իբր, չէին հասկանում և շարունակում էին այդ բանակցությունները:

«Հնարավոր էր այդ առաջխաղացումը կասեցնել, եթե ժամանակին այնտեղ պարզապես տեղավորված լիներ մեր զորքը, ինչը չի արվել: Չի արվել նույնիսկ այն ժամանակ, երբ ակնհայտ էր դարձել, որ ադրբեջանցիները այդտեղ ինչ-որ ակտիվ գործողությունների են նախապատրաստվում: Դրանից մեկ շաբաթ անց ադրբեջանցիները ներխուժեցին հայկական տարածք և պարզվեց, որ այնտեղ միջոցներ չեն ձեռնարկվել անվտանգությունը ապահովելու համար: Մեկ շաբաթում կարելի էր և անհրաժեշտ քանակով զորք բարձրացնել այդտեղ և մի շարք այլ կարևոր գործողություններ անել, սակայն ոչինչ չի արվել: Եվ ադրբեջանցիների ներկայությունը բացահայտվել է միայն հովիվների հետ հանդիպումից հետո, այսինքն` սա բարձիթողի վիճակ է»,- շեշտել է Վրթանեսյանը:

Հեղինակ՝ Անի Մշեցյան

Աղբյուր` Փաստինֆո