Փաստ ինֆո

Այնպիսի տպավորություն է, կարծես թե բոլորը մոռացել են սահմանին տիրող իրավիճակի մասին և զբաղվում են նախընտրական աժիոտաժով: Այս մասին «Թերթ.ամ»-ի հետ զրույցում ասաց ԼՀԿ խմբակցության պատգամավոր Աննա Կոստանյանը՝ հավելելով, որ չնայած նախընտրական տրամադրություններին, բոլորի ուշադրության կենտրոնում պետք է լինի սահմանը:

«Շատ տարօրինակ հանդարտություն է տիրում, կարծես թե բոլորը մոռացել են սահմանին տիրող իրավիճակի մասին և զբաղվում են նախընտրական աժիոտաժով: Դա շատ վտանգավոր է, քանի որ հնարավոր է, որ այդ հատվածներին բավարար չափով ուշադրություն չի դարձվում համապատասխան գերատեսչության կողմից: Եվ ես տեղեկություններ էլ չունեմ, արդյոք բոլոր միջոցառումները ձեռք են առնվում դիրքերը ամրացնելու, եթե հանկարծ Ադրբեջանը որոշի լայնածավալ հարձակում իրականացնել»,- մտահոգություն հայտնեց  Կոստանյանը:

Նա նաև շեշտեց, որ պետության ղեկավարների կողմից բացատրություններ չկան, թե ինչ բանակցություններ են ընթանում, կամ ինչ գործողություններ են իրականացվում։ 

«Եթե մենք հիմա հարց տանք, մեզ կպատասխանեն, որ դա պետական գաղտնիք է: Սակայն այս հարցը վերաբերվում է մեր քաղաքացիների անվտանգությանը: Եթե կա խնդիր, այդ խնդրին պետք է տրվի լուծում, լուծումը դա սահմանների ապահովությունն է»,- ասաց պատգամավորը՝ շեշետելով, որ այն անկնկալիքները, որոնք մենք պետք է ունենանք մեր պետությունից, մենք ունենք այլ, օտար երկրներից.«Հիմա մենք դիմել ենք ՀԱՊԿ-ին խորհրդակցությունների համար և պետք է սպասել խորհրդատվությանը: Մնացած քայլերը պետք է անեն մեր պետության պատասխանատուները: Նաև պետք է դիվանագիտական աշխատանք կատարվի, որ եթե Ռուսաստանի հետ ինչ-որ բան այնպես չգնա, մենք ունենանք պլան Բ-ն»,-ասաց  Կոստանյանը:

Աղբյուր` Փաստինֆո