Փաստ ինֆո

Վերջին շրջանում համաշխարհային ուժային կենտրոնների հարաբերությունները տարերային արագությամբ փոխվում են: Նման շրջադարձային ժամանակներում առավելագույնը, որ կարող են անել փոքր ազգերը, դա մեծերի շահերի բախման կիզակետում չհայտնվելն է, իսկ հայտնվելու դեպքում նրանցից որևէ մեկի պայքարին չզինվորագրվելը: ԱԺ-ում ելույթի ժամանակ ասաց իմքայլական պատգամավոր Արման Եղոյանը:

Պատգամավորի խոսքով՝ փոքր ազգերը պետք է պաշտպանեն իրենց գոյութենական անվտանգությունն և փորձեն համագործակցել բոլոր պետությունների հետ.

«Ով հիմա փորձում է մեր երկրում հակադրել գերտերությունների շահերը նա առնվազն հիմար է , առավելագույնը՝ ազդեցության գործակալ, ով հիմա փորձում է, ով փորձում է հիմա հայհոյել Ռուսաստանին, ԱՄՆ-ին, Ֆրանսիային, Չինաստանին, Հնդկաստանին, Իրանին, իմացեք՝ նա Հայաստանի թշնամին է: Մենք մեր գործողություններով երբևէ չպետք է տեղ տանք որևէ գերտերության այստեղ՝ իրենցից մեկի դեմ որևէ դավադրության նշույլ անգամ նշմարել: Մեծերի բախման կիզակետում փոքրերը շահելու բան չունեն: Պետք է ամեն ինչ անենք, որպեսզի մեր երկրում մեծերի շահերը ոչ թե հակադրվեն, այլ համադրվեն:

Հզոր տերությունները այլ չափումներով են մտածում, այլ մասշտաբներով են գծեր քաշում, ու իրենց քաշած գծերի հաստությունը մեր նման պետությունների՝ նույնիսկ ամենալայն հատվածից ավելի լայն կարող է լինել: Մեծերի հետ հարաբերություններում մենք պետք է դնենք միայն մեր, հայկական շահը. միայն այդ դեպքում է, որ այդ շահը շանս կունենա քննության առարկա դառնալու և շահերի մեծ ընտանիքում ներառվելու»,- ասաց Արման Եղոյանը:

Աղբյուր` Փաստինֆո