Փաստ ինֆո

«ՌԴ-ից ու ՀԱՊԿ-ից միայն չեն ասում եկեք սահմաններ որոշենք իրար հետ։ Գործընթացը շարունակվում է, քննարկումները շարունակվում են և ես չեմ կիսում ձեր մոտեցումները»,- այս մասին խորհրդարանում լրագրողների հետ զրույցում ասաց ԱԺ «Իմ քայլը» խմբակցության պատգամավոր Հրաչյա Հակոբյանը՝ անդրադառնալով Հայաստանի անվտանգության շահերից ՀԱՊԿ և ՌԴ դիմումներին և դրանց պատասխաններին։ Հակոբյանը նշում է, որ լարված և նուրբ իրավիճակ է։ Անդրադառնալով ՀՀ տարածքում գտնվող ադրբեջանցիների թվին, Հակոբյանը հաստատեց, որ նրանց թիվը չի պակասում։

«ՀՀ-ում գտնվող զինված ադրբեջանցիների թիվը չի պակասում, բայց որոշ հարցադրումների դեպքում փորձում են ներկայացնել այնպես, որ ավելացել է, բայց համենայնդեպս չի էլ ավելացել։ Ես նման տեղեկություն չունեմ»։

Պատգամավորը տեղեկություն չունի անգամ, որ ադրբեջանցիները Տեղ համայքնում ամրաշինական գործողություններ են իրականացնում, բայց կրկնեց՝ լարված իրավիճակ է ու միաժամանակ քննարկումները շարունակվում են։ Հորդորեց թույլ տալ պատկան մարմիններին աշխատել։

«Մտահոգիչ է ստեղծված իրավիճակը։ ՀԱՊԿ-ի հետ քննարկումները շարունակվում են»։

Դիտարկմանը, թե արդյոք պետք էր ՀԱՊԿ-ին դիմել այլ հոդվածով, պատգամավորը նշեց, որ հարցը սխալ մարդու են ուղղում, քաղաքական թիմի անդամ է, բայց կոնկրետ ոլորտային պատասխանատուներ կան իրենց թիմում։ Անդրադառնալով ռազմական դրություն մտցնելու որոշմանը, նույնիսկ ընտրությունները հետաձգելու մասին խոսակցություններին, Հակոբյանը նշեց, որ նման քննարկման մասին տեղյակ չէ, բայց նաև՝  այս պահին անհրաժեշտություն չի տեսնում։

«Քանի դեռ քննարկումները շարունակվում են, քանի դեռ սահմանին ունենք կայուն իրավիճակը, այսինքն որևէ սրում, լարվածությւուն չկա, զորքերը գտնվում են այն դիրքերում, որ գտնվում են, կարծում եմ, ոչ»։

Անդրադառնալով գործընկերոջ հայտարարությանը, թե Տավուշում կան գյուղեր, որոնք պետք է հանձնվեն, նշեց, որ չի ուսումնասիրել քարտեզագրումը, տեղյակ չէ, թե որտեղ կան անկլավներ։

«Եթե կան անկլավներ, այդտեղ անհանգստանալու որևէ բան կա։ Եթե բոլորը գիտեն, որ կան անկլավներ։ Պետք է ելակետային բան ունենանք՝ որտեղից սկսենք։ Հիմա առաջարկ կա՝ վարչապետը ԱԺ-ից ասաց, միգուցե քննարկումների արդուքնում ասենք, որ մեր սահմանները նրանք են, որոնք մենք հիմա ունենք։ Դրանք բոլորը քննարկումներ են։ Ոչ մեկը գյուղեր հանձնելու մասին չի խոսում, դեռ գնում են քննարկումներ։ Որոնք են մեր ելակետային տարածքները, մենք քննարկում ենք, որևէ գյուղ չենք տալիս»։

Հակոբյանը հավելեց, որ գուցե բանակցությունների և սահմանազտման համար հիմք կհանդիսանան այսօրվա և ոչ ԽՍՀՄ քարտեզները։

«Ինչո՞ւ եք ասում թշնամին պետք է քարտեզ բերի։ Մենք էլ մեր քարտեզն ենք տանելու թշնամուն դեմ տանք։ Մենք այսօրվա ձեռքի տակ ունեցած քարտեզներով գնում ասում ենք մեր տարածքներն են, պարզվեց իրենք են կեղծ քարտեզով եկել»։

Աղբյուր` Փաստինֆո