Փաստ ինֆո

Խորհրդարանական դիվանագիտությունը, ինչպես այս դժվար հարցում, այնպես էլ մյուս հարցերում, գործում է իր հնարավորությունների և ուժերի ողջ ծավալով և նույնիսկ ծավալից անդին: Այս մասին ԱԺ մեկնարկին ելույթի ժամանակ ասաց ԱԺ նախագահ Արարատ Միրզոյանը՝ անդրադառնալով Մոսկվայում ՌԴ Պետդումայի նախագահ Վյաչեսլավ Վոլոդինի հետ հանդիպմանը, և դիտարկմանը, թե ՌԴ-ն իր ռազմավարական դաշնակցի առջև ստանձնած պարտավորությունները չի կատարում՝ Սյունիքում առաջացած ճգնաժամը հաղթահարելու առումով։

«Մեր պատգամավորները, բարեկամական խմբերը, պատվիրակությունները չափազանց ակտիվ են այս հարցում: Գործադրվում են բոլոր ջանքերը միջազգային հանրության ուշադրությունն այս հարցի վրա սևեռելու, այն մոռանալ չտալու և լուծումներ գտնելու ուղղությամբ: Այդ ջանքերի արդյունքները արտահայտվում են հայտարարությունների և բանաձևերի տեսքով»,-ասաց Միրզոյանը:

ԱԺ նախագահը նշեց, որ Հայաստանն ունի անվտանգային հարցերին առնչվող միջազգային պայմանագրեր՝ երկկողմ, բազմակողմ.

«Չեմ կարծում, որ մեր դաշնակից պետությունները չեն կատարելու իրենց պարտավորությունները: ՀԱՊԿ-ի և ՌԴ-ի հետ մեր երկխոսությունը շարունակվում է: Կարծում եմ՝ պետք է պահպանել լավատեսությունը։ Միշտ չէ, որ այսպիսի բարդ հարցերը լուծվում են կայծակնային արագությամբ, և, երբեմն սառնասրտությունը և համբերատար աշխատանքն ավելի արդյունավետ են և ցանկալի»,-ասաց Միրզոյանը՝ հավելելով, որ միջազգային հանրությունն ու ՀՀ-ն պետք է ջանքեր գործադրեն՝ րոպե առաջ այս իրավիճակը հանգուցալուծելու և ՀՀ տարածքային ամբողջականությունը վերականգնելու համար։

Աղբյուր` Փաստինֆո