Փաստ ինֆո

ՀՀ իշխանության թույլ դիվանագիտության արդյունքն է, որ թուրքի բերանում այնքան լեզու են դրել, որ անարգել կարողանում է մտնել ՀՀ տարածք։ «Փաստինֆո»-ի հետ զրույցում «Արծիվ 30» մահապարտների գնդի փոխհրամանատար Եփրեմ Մարգարյանը տեղեկացրեց, որ թշնամու դեմն առնելու հրաման կա, բայց կտրուկ գործողությունների հրաման չի լինում, ինչը զարմանալի է։ Մահապարտը հավելեց, որ հիմա իշխանությունները մեղադրում են ընդդիմադիր ուժերին, որ եթե իրենք չլինեին, ադրբեջանցիները դուրս կգային ՀՀ տարածքից, իսկ ընդդիմությունը մեղադրում է իշխանությանը, թե իրենք են ադրբեջանական ուժերին բերել ՀՀ տարածք։

«Նախ, ով է թողել նրանց մտնեն ՀՀ տարածք, երկրորդ՝ ի՞նչ նպատակ է հետապնդում սա։ Նիկոլ Փաշինյանն ասում է, որ ընդդիմությունը թույլ չի տալիս ադրբեջանական զորքերը դուրս գան ՀՀ տարածքից։ Այսինք՝ ընդդիմությունը վարձե՞լ է, ադրբեջանական բանակին ասել է խնդրեմ համեցե՞ք։ Ընդդիմությունը նախ նման իշխանություն չունի, իշխանավորների ձեռքն է ներկայիս իշխանությունը և թող չփորձեն թույլ քաղաքականությունը գցել ընդդիմադիրների վրա։ Մեր թույլ ընդդիմությունն էլ՝ արդեն կասկածելի է՝ արդյոք ընդդիմություն կա ՀՀ-ում, ինչո՞ւ չեն ստիպում իշխանություններին աշխատել, որպեսզի ադրբեջանական ԶՈՒ-երը, որոնք ապօրինի ձևով մտել են ՀՀ տարածք, դուրս գան։ Ինչ բանակցությունների մասին է խոսքը, երբ նրանք սահմանախախտներ են»։

Հարցին, թե քաղաքական ղեկավարությունն ուզում է հարցը լուծել խաղաղ ճանապարհով, ստորագրվելու է նոր փաստաթուղթ, հետեւապես ի՞նչ պետք է անի ռազմական ղեկավարությունը, մահապարտը նկատեց, որ Պաշտպանության նախարարը և ԶՈՒ ԳՇ պետը սուս ու փուս ենթարկվում են մի մարդու ասածին, որն առհասարակ պատկերացում չունի՝ ի՞նչ է բանակը։

«Ինչո՞ւ են ենթարկվում են տվյալ մարդուն, չեն ստիպում ՀՀ վարչապետին, որ սա սխալ է, ռազմական օրենքներով նման բան չի կարող լինել։ Ինչո՞ւ իրենք չեն ստիպում վարչապետին, որ ինքը աշխատի, կամ տա այդ հրամանը, թե որտեղ պետք է կտրուկ լինել։ Մեր զինվորականները պատրաստ են կտրուկ գործողությունների անկասկած։ Եթե գերագույն գլխավոր հրամանատար կոչեցյալը ինքը չի հասկանում, թե դա ինչ է, թող մեր զինվորական էլիտան ստիպի իրեն, կամ հասկացնի։ Պարտավոր են ստիպելու, որ գերագույն գլխավոր հրամանատար կոչեցյալը գործի ըստ զինվորական կանոնակարգի»։

Դիտարկմանը, թե գուցե չեն ուզում դիմել գործողությունների, որովհետև փաստաթուղթը պետք է կյանքի կոչվի՝ Մարգարյանը նշեց, որ մեկնաբանություն չունի, որովհետև նախ տեղյակ չէ՝ ի՞նչ փաստաթուղթ է, բացի այդ, Փաշինյանը հանրությանը չներկայացրեց փաստաթղթի կետերը, հաստատեց միայն, որ ստորագրելու է։ Ավելին՝ պարզվում է, որ այս օրերին, ինչ ադրբեջանցիները ներխուժել են ՀՀ տարածք, պաշտպանության նախարարը Սյունիք չի այցելել։

«Վերջիվերջո մեր ռազմական էլիտան պետք է հասկանա, որ Տիգրան Ավինյաններ, կամ մնացածը տվյալ իրավիճակից շատ հեռու մարդիկ են։ Ավելի լավ էր մի լուրջ զինվորական գար գնահատեր օպերատիվ վիճակը, քան թե Տիգրան Ավինյանի լուսանկարը։ Ես հավատացած եմ, որ եթե այսօր առաջնագծում սահմանային ճշտումների ժամանակ անգամ ամենաթույլ հրամանը, որ զորքերին կուղղորդի, որ հետ տան թուրքերին, հաստատ հավատացեք, որ կարող է լինել, որովհետև նրանք էլ մի ինչ- որ վիճակի չեն, որ ամուր կանգնեն»։

Մահապարտն անձամբ է եղել Իշխանասարում, որտեղ մայիսի 20-ին Սյունիքում Սև լճի հատվածում ՀՀ տարածք ներխուժած ադրբեջանցիները փորձել են առաջ գալ, բայց չի հաջողվել։ Սյունեցիներն ու առաջին բանակային կորպուսի զինծառայողներթ կասեցրել են թշնամու առաջխաղացման փորձը։

Մահապարտն ասում է՝ արել են կտրուկ գործողություններ, իհարկե, ոչ զենքի կիրառմամբ, պարզապես վախեցրել են։

«Իրենց սովորեցնում են՝ «ձեռքներդ դրեք գրպաններդ, շվշվացնելով մտի հայկական հող, քեզ ոչ մեկ ոչինչ չի ասի, բայց դե չենք մոռանում, որ գործ ունեն արմատական սյունեցիների հետ, որոնք չեն հանդուրժել դա, նյարդերը տեղի է տվել և Ադրբեջանը ստացել իր բաժին ծեծը։

Հավատացած եմ՝ մի փոքր հրաման լինի, այդտեղ զենք օգտագործել պետք չէ, ուղղակի մի փայտով կարող ես հետ տալ։ Առուշը, կամ մյուս համայնքի ղեկավարները, որոնք անմիջական մասնակիցն են եղել այդ գործողություններին, գործել են սյունեցուն վայել։ Թուրքը իր տեսակով է տենց, երբ երես ես տալիս, աստառ էլ է ուզում, մի բան էլ ավելին։ Բայց երբ հանդիպում է արժանի դիմադրության, սկսում է դրա մասին մտածելը ու տղաներն էնպես արեցին, որ արդեն մտածելու տեղիք ունեն»։

Մահապարտը տեղեկացրեց նաև, որ ադրբեջանցիները ևս չունեն կահավորանք, մնում են բաց երկնքի տակ, որովհետև թիկունքային ապահովման խնդիրներ ունեն, իսկ ՀՀ զինծառայողները ունեն վրաններ, իսկ եթե չունեն, փոս են փորում, թիկնոց վրաններով ծածկվում։ Քանի որ չկա հստակ սահման, տարածքներում էլ չեն եղել են հստակ դիրքեր, ուստի կահավորման մասին խոսք լինել չի կարող։

Նրա խոսքերով՝ ուղղակի հրաման է պետք և տղաներն այնքան պատրաստակամություն ունեն, որ կարող են նրանց դուրս քշել. «1000 ադրբեջանցին ի՞նչ է, որ դուրս չկարողանան հանել»։

Աղբյուր` Փաստինֆո