Փաստ ինֆո

Գեղարքունիքի Կութ գյուղում իրավիճակը շարունակում է նույնը մնալ։ Ադրբեջանցի զինվորականները ոչ հետ են գնացել, ոչ էլ առաջացել են։ «Փաստինֆո»-ի հետ զրույցի ժամանակ այս մասին ասաց Կութի գյուղապետ Սիմա Չիտչյանը։

«Նույն տեղում են։ Ամեն ինչ նույնն է։ Ոչ մի փոփոխություն չկա։ Մենք էլ ենք անհանգիստ, տեսնենք ինչ է լինում»,-ասաց Սիմա Չիտչյանը։

Գյուղապետի խոսքով բնակիչներն իրենց անասուններին մոտ տարածքներում են արածացնում։
«Արոտի վայր չեն տանում։ Վերևի մասերը, որտեղ նրանք են, անասուններին չեն տանում։ Իրենց տների հետևում, մարդ կա իրենց բոստանում են արածացնում։ Բա ի՞նչ անենք, հո չենք կոտորելու անասունին։ Օրերն էինք հաշվում, որ գարունը բացվի, անասունն արոտի դուրս գա, բայց մինչև անասունի դուրս գալը նրանք եկան»,-ասաց Սիմա Չիտչյանը։

Վերջինս նկատեց` այնպես չէ, որ մարդիկ վախենում են տնից դուրս գալ և իրենց բնականոն կյանքով ապրել։ Նրանցից յուրաքանչյուրը շարունակում է իր գյուղատնտեսական աշխատանքով զբաղվել, դպրոցի դասերն էլ հեռավար են անցկացվում։

«Սպասողական վիճակում ենք։ Սպասում ենք, որ հեսա մի լավ լուր կլսենք, մեր օգտին մի լավ բան կլինի։ Դրան ենք սպասում, դրա համար հանգիստ ենք»,-նշեց Սիմա Չիտչյանը։

Աղբյուր` Փաստինֆո