Փաստ ինֆո

Թեպետ ռազմական գործողությունների ակտիվ ֆազան ավարտվել է, բայց մենք պետք է փաստենք, որ պատերազմը շարունակվում է: Եվ մենք այսօր ականատես ենք սողացող օկուպացիայի: Այս մասին «Պատիվ ունեմ» դաշինքի կազմակերպած «ՀՀ և Արցախի անվտանգության միջավայրը հետպատերազմական ժամանակաշրջանում» թեմայով քննարկման ժամանակ ասել է Հայաստանի նախկին վարչապետ Խոսրով Հարությունյանը:

«Օկուպացիան տեղի է ունենում թշնամու կողմից ռազմավարական դիրքեր գրավելու ճանապարհով: Հակառակորդը օգտվելով գործող իշխանությունների անգործությունից, փորձում է իր ձեռքը վերցնել այնպիսի դիրքեր, որոնք հետագայում մեր անվտանգության սպառնալիքն են դառնալու»,-շեշտեց Հարությունյանը:

ՀՀ նախկին վարչապետը նաև ասաց, որ մենք հայտնվել ենք բարդ իրավիճակում և լուծումները այնքան էլ պարզ չեն, սակայն, պետք է քննարկումների արդյունքում գտնել այդ լուծումները:

«Այսօր դատարկ խոսքեր են, որ Հայաստանը հանդիսանում է Արցախի անվտանգության երաշխավորը: Չնայած արցախյան հակամարտությունը լոկալ հակամարտություն է, սակայն ի տարբերություն տարածաշրջանի մյուս հակամարությունների, այն իր մեջ պարունակում է աշխարհաքաղաքական մեծ պոտենցիալ: Այսօր տարածաշրջանը հայտնվել է աշխարհաքաղաքական նոր կոնֆիգուրացիայում, հայտնվել են նոր սպառնալիքներ Հայաստանի համար: Պետք է մշակել Հայաստան-Արցախ անվտանգային դինամիկ անշրջելի երաշխիքներ ստեղծելու խնդիրը»,-նկատեց Հարությունյանը՝ հավելելով, որ որևէ պարագայում, եռակողմ հայտարարությունը չի կարող դառնալ արցախյան խնդրի կարգավորման պայմանագրային իրավական «կարկասը»։ 

Աղբյուր` Փաստինֆո