Փաստ ինֆո

Հայաստանի ինքնապաշտպանության կոմիտեն պահանջում է ժամանակավոր կառավարությունից Հայաստանի Հանրապետության անունից չստորագրել որեւէ փաստաթուղթ, որը հիմքեր կստեղծի զիջել Հայաստանի Հանրապետության տարածքները:

Պահանջը վերահաստատվեց այսօր՝ մայիսի 22-ին Հայաստանի ինքնապաշտպանության կոմիտեի («5165» շարժումը, «Զարթոնք» ազգային քրիստոնեական կուսակցությունը) հրավիրված հանրահավաքի ժամանակ։

«Ես մի մարդ եմ, որը չի հաշտվում մեր երկրում ստեղծված իրավիճակի հետ և պատրաստ եմ մինչև վերջ պայքարել»,- հանրահավաքի ժամանակ հայտարարել է 5165 կուսակցության առաջնորդ Կարին Տոնոյանը՝ հրապարակելով մի զինվորի նամակ, որը կոչ է անում հայ ազգին ոտքի կանգնել և պայքարել ստեղծված իրավիճակի դեմ:

«Մեզ այսօր համոզում են, որ Հայաստանում չկան Մոնթեներ, Նժդեհ, այն 5000 զինվորների նման տղաներ, որոնք պատրաստ են իրենց կյանքը զոհել Հայրենիքի համար: Բայց դուք հավատո՞ւմ եք դրան: Իհարկե ոչ: Մեզ հարցնում են, հնարավոր է արդյո՞ք Հայաստանում ստեղծել մի ուժ, որը կապված չի լինի որևէ մեծահարուստի հետ, այո, իհարկե, հնարավոր է»,- նշել է Տոնոյանը՝ արձանագրելով, որ հանրահավաքի բոլոր մասնակիցները Նժդեհներ և Մոնթեներ են, որոնք կարող են պայքարել և պաշտպանել հայրենիքը:

Զոհված զինվորի մայրը հիշեցրել է Ռուսաստանի նախագահ Վլադիմիր Պուտինի հայտարարությունը, որ դեռ հոկտեմբերի 19-ին առաջարկում էր կանգնեցնել պատերազմը, որի պայմաններում Հադրութը ու Շուշին կմնային հայկական կողմին, սակայն Հայաստանի վարչապետը մերժել է այդ առաջարկը:

«Ինչ է սա, եթե ոչ դավաճանություն: Արդյո՞ք այսպիսի մարդն իրավունք ունի կառավարել մեր երկիրը: Մենք պետք է այդ մարդուն հեռացնենք իշխանությունից, հեռացնենք Հայաստանից: Անգամ, եթե մենք լինենք 10 հոգի, ապա կպաշտպանենք մեր հայրենիքը մինչև վերջին շունչը: Հայաստանը ի զորու է պայքարել։ Դուք կասեք դրա համար փող է պետք, իսկ մի՞թե Հայաստանում փող չկա: Ես ուզում եմ դիմել կանանց, մայրերին՝ մի քանի տարի առաջ ես ձեզ դիմում էի զարդերով, բայց դրանք ինձ պետք չեկան, ես չկարողացա այդ զարդերով պաշտպանել իմ որդուն: Եվ մենք՝ մայրերը, կանայք, կտանք մեր բոլոր զարդերը և կպաշտպանենք մեր Հայրենիքը»,- շեշտել է նա:
Տոնոյանը նաև նշեց, որ այսօր զինվորին թույլ չեն տալիս կրակել և մեր զինվորը ստիպված է անզեն ձեռքերով կանգնել սահմանին:

«Ուզում եմ դիմել սպաներին, պարոնայք սպաներ, ոտքի կանգնեք: Հայաստանը ծնկի չի գալու»,- եզրափակեց 5165 շարժման ղեկավարը:

Աղբյուր` Փաստինֆո