Փաստ ինֆո

Ակնհայտ է, որ ընդդիմադիրների գործողությունները որոշակի արդյունքներ տալիս են, թեև այն ինչ, որ բոլորս ակնկալում ենք, դեռևս չկա։ Այս մասին լրագրողների հետ զրույցում հայտնեց իրանագետ Վարդան Ոսկանյանը՝ «Պատիվ ունեմ» դաշինքի կազմակերպած «ՀՀ և Արցախի անվտանգության միջավայրը հետպատերազմական ժամանակաշրջանում» թեմայով քննարկմանը՝ անդրադառնալով հարցին, թե ստեղծված իրավիճակում արդյոք ընդդիմադիրների գործողությունները համարժեք են։

Ոսկանյանը նշեց, որ երկու օր առաջ կառավարության մոտ տեղի ունեցած ցույցի ընթացքում, երբ հավաքվել է մոտ 5000 քաղաքացի, պատճառ դարձավ, որ Արտաքին գործերի նախարարությունը հայանպաստ հայտարարությամբ հանդես գա։

Ոսկանյանը նշեց, որ պայքարը տեղավորվում է իրենց կարողությունների շրջանակներում, որոնք են նաև նման քննարկումները։  Ակնհայտ է, որ ներկա վարչախումբը չի կարող հետ պտտել պատմության անիվը և այն պտտվում է ի վնաս իշխանությունների։

«Նրանք հեռանալու են, ուղղակի յուրաքանչյուր օր մեր գլխին բերում են նոր պատուհասներ, մեր հասարակությանը՝ մատնում նոր անհանգստությունների։  Բնակչությանը սպառնում են անվտանգային նոր սպառնալիքներ։ Մենք աշխատում ենք լինել ազգային գործիչներ և չենք կարող հասարակությանը խաբել միայն նրա համար, որպեսզի ձայներ հավաքենք»։

Ոսկանյանը չմեկնաբանեց մամուլում շրջանառվող տեղեկությունները, թե ինչ նպատակով են Իրանից գեներալներ ժամանել Հայաստան։

«ՀՀ-ում ԻԻՀ դեսպանը ԵՊՀ-ում մեկ նախադասություն արտասանեց, որ ՀՀ-ի և Իրանի միջև տեղի է ունենում ռազմական համագործակցության ոլորտում որոշակի գործընթաց, սա միանշանակ խրախուսելի գործընթաց է»։

Իրանագետը ներկայացրեց նաև Զանգեզուրի միջանցքի տրամադրումը Ադրբեջանկաան կողմին անցնելու վերաբերյալ Իրանի Իսլամական հանրապետության դիրքորոշումը.

«Ակնհայտ է, որ իրանցիները համարում են, որ վերջին պատերազմում իրենք չշահած կողմ են և այժմ Իրանի քաղաքականությունը ակտիվացել է հարավային Կովկասում և Իրանին անհրաժեշտ է հնարավորինս ուժեղ Հայաստան. սա բխում է առաջին հերթին իրանական շահերից։ Ապագայի Հայաստանի և իրանական շահերը համընկնում են և կարող ենք այդ ուղղությամբ աշխատել»։

Անդրադառնալով Բաքվի բռնապետի հայտարարություններին, իրանագետը նշեց, որ Հայաստանի բնակչությունը չի հանձնվել, որքան էլ որ ադրբեջանական կողմը փորձի այս իրավիճակից օգտվել ու հանրավորինս շատ զիջումներ կորզել։ Ոսկանյանը նկատեց, որ ԱԳՆ հայտարարությունում հստակ սահմանված էր այն դիրքորոշումը, որը կարող էր ընկալելի լինել նաև միջազգային գործընկերների համար՝ պետք է իրականացվի Արցախի օկուպացված շրջանների դեօկուպացիա, պետք է արցախյան խնդրի հայանպաստ լուծումը շաղկապվի Ադրբեջանի հետ հնարավոր խաղաղության պայմանագրի հետ.

«Մինչև մենք չունենանք Արցախի խնդրի հայանպաստ լուծում, որևէ խաղաղության պայմանագրի մասին խոսել չի կարելի»։

Աղբյուր` Փաստինֆո