Փաստ ինֆո

ԱԺ «Իմ քայլը» խմբակցության պատգամավոր Անդրանիկ Քոչարյանը պարտվել է «Հրապարակ» օրաթերթին՝ պարտավորվելով փոխհատուցել խմբագրությանը՝ փաստաբանի վարձատրության գումարը։

Օրաթերթի գլխավոր խմբագիր Արմինե Օհանյանը «Փաստինֆո»-ի հետ զրույցում դրական գնահատեց դատարանի որոշումը՝ այն առումով, որ լրատվամիջոցները պետք է վստահ լինեն, հանգիստ գործեն, չվախենան նման պաշտոնյաներից։

Նշենք, որ այս դատական գործն ունի արդեն երկու տարվա պատմություն։ Դեռեւս 2019 թվականի մարտին ԱԺ «Իմ քայլը» խմբակցության պատգամավոր Անդրանիկ Քոչարյանը դատի էր տվել «Հրապարակ» օրաթերթին՝ փետրվարի 12-ին հրապարակված «Ով է իրականում Անդրանիկ Քոչարյանը» վերտառությամբ նյութի համար, որի հեղինակը Գյումրիի բնակչուհի, հասարակական գործիչ Հասմիկ Մելքոնյանն է։ Վերջինս թերթի աշխատակից չէ, այլ հանդես էր եկել հեղինակային հրապարակմամբ՝ արձանագրելով, որ «այս տխրահռչակ գործչին (Անդրանիկ Քոչարյանին-խմբ.) թվացել էր, թե իր նոր կարգավիճակը՝ ԱԺ մշտական հանձնաժողովի նախագահի պաշտոնում, մոռացնել է տվել իր անցյալը, եւ Գյումրիում էլ ջնջվել են իր թողած հետքերը։ Այս հոդվածը զայրացրել էր Ա.Քոչարյանին եւ նա դատի էր տվել ոչ թե հրապարակման հեղինակին, այլ թերթին՝ պահանջելով ոչ միայն ներողություն խնդրել, այլ նաեւ փոխհատուցել ենթադրյալ զրպարտության համար։ Սակայն երկու տարի տեւած դատական գործընթացների արդյունքում դատարաններն արձանագրել են, որ թերթը ոչ միայն չպետք է ներողություն խնդրի, առավել եւս փոխհատուցի, այլ դեռ Անդրանիկ Քոչարյանը պետք է փոխհատուցի՝ թերթին դատական քաշքշուկների մեջ ներքաշելու համար։

Ինչ ազդեցություն կունենա դատական այս ակտը, կսթափեցնի այն Անդրանիկ Քոչարյանին, որը լրատվամիջոցների հետ հաղորդակցվելիս ցուցաբերում է առանձնակի ցինիկ վարքագիծ։

«Այդ հարցը երևի իրեն պետք է ուղղեք, որովհետև չեմ կարող ասել, թե ինքը իր ցինիզմի, անամոթության, անբարոյականության սահմանները մինչև ո՞ւր են ձգվում։ Ամեն դեպքում, ինձ թվում է, դա լավ փաստ է լրատվամիջոցների համար։ Նախ, որ բարձր պետական պաշտոնյան երկար-բարակ դատական պրոցեսներից հետո, բոլոր հնարավոր ճանապարհները փորձել է, բոլոր ատյաններին դիմել է, բայց պարտվել է լրատվամիջոցին։ Դա շատ դրական փաստ կարելի է արձանագրել զուտ այն առումով, որ լրատվամիջոցները պետք է վստահ լինեն, հանգիստ գործեն, չվախենան նման պաշտոնյաներից և իրենց անելիքն անեն՝ անկախ նրանից, թե ինչ հարձակումների են ենթարկվում, ինչպես են իրենց պահում քաղաքական գործիչները։ Ինձ թվում է, այս առումով շատ ողջունելի ու դրական փաստ է սա»,- ասաց Ա.Օհանյանը։

Հարցին, թե ինչ ազդեցություն կունենա որոշումը մյուս պաշտոնյաների վարքագիծը զսպելու հարցում, որպեսզի պաշտոնյաները ԶԼՄ-ների հետ շփվեն կոռեկտության սահմաններում և ավելի պատասխանատու դառնան՝ Օհանյանն արձանագրեց, որ կոռեկտությունը մարդու դաստիարակության, կուլտուրայի, կրթվածության, աշխարհայացքի հետ կապված խնդիր է և դատական հաղթանակով չենք կարող իրենց մղել կոռեկտության։

«Պարզապես այս փաստը իրենց պետք է հուշի, որ այդպես չէ, որ իրենք կարող են իրենց պաշտոնեական դիրքը օգտագործել, փորձել ճնշել լրատվամիջոցներին և հասնել նրան, որ իրենց նկատմամբ քննադատությունը, վերաբերմունքը փոխվի։ Այս առումով ինձ թվում է, բավականին ուսանելի փաստ է։ Նույն պաշտոնյաները պետք է հասկանան, որ դատարան դիմելը, փորձելը մեզ սահմանափակել, մեր բերանները փակելը արդյունք չի տալու։ Մենք շարունակելու ենք մեր գործը՝ անկախ ամեն ինչից, ով ուզում է լինի իշխանության գլխին։ Պետք չէ վախենալ այդ պահվածքից, պետք չէ զգուշանալ, կոմպլեքսավորվել իրենց հարձակումներից, վիրավորանքներից։ Հակառակը, պետք է հանգիստ, խաղաղ անել գործը»։

Դիմելով լրատվամիջոցներին՝ օրաթերթի գլխավոր խմբագիրը նշեց, որ կցանկանար, որ մյուսներն էլ իրենց գործունեության ընթացքում հաշվի առնեն, որ այդ տեսակ գործիչներին պետք չէ «երես տալ», որովհետև լրատվամիջոցները՝ տվյալ անձանց հաճախակի լուսաբանելով, մեծացնում ուժեղացնում են այդ անձանց ազդեցության դաշտը։

«Գուցե երբեմն կարելի է բոյկոտել, երբեմն հարկավոր է անտեսել, շրջանցել այդ մարդկանց։ Ինձ թվում է, մենք նաև պետք է հետևություններ անենք իրենց պահվածքից։ Ավելի շատ կարծում եմ, մենք պետք է հետևություններ անենք, քան իրենք, որովհետև ես հույս չունեմ, որ այդ մտածողության տեր մարդիկ կարող են վերափոխել», - ասաց Օհանյանը՝ նշելով, որ Անդրանիկ Քոչարյանին հաճախ չեն լուսաբանում։

Աղբյուր` Փաստինֆո