Փաստ ինֆո

Երեկ ընդդիմությունը տարածել էր քննարկվող եռակողմ փաստաթղթի ամբողջական տարբերակը, որը հաստատել է նաև Նիկոլ Փաշինյանը, դրան կից որևէ փաստաթուղթ չկա, որևէ գաղտնի կետ չկա: Այս մասին լրագրողների հետ զրույցում ասաց «Իմ քայլը» խմբակցության պատգամավոր Ռուբեն Ռուբինյանը:

Պատգամավորն ընդգծեց, որ փաստաթղթի քննարկումը կարող է տեղի ունենալ նաև միայն ադրբեջանական զորամիավորումների ելման դիրքեր վերադառնալու դեպքում.

«Ռուսաստանի կողմից եղել է առաջարկ ստեղծել եռակողմ հանձնաժողով՝ դելիմիտացիայի և դեմարկացիայի վերաբերյալ: Մենք ի պատասխան այս առաջարկի ասել ենք, որ սա կարող է տեղի ունենալ միայն ադրբեջանական զորքերի՝ ՀՀ ինքնիշխան տարածքից դուրս գալու և ելման դիրքեր վերադառնալու դեպքում»,-ասաց Ռուբինյանը:

Պատգամավորն ընդգծեց, որ խոսքը գնում է հայ-ադրբեջանական սահմանի դելիմիտացիայի և դեմարկացիայի մասին և ստեղծվելիք հանձնաժողովը որևէ կապ չի ունենալու Արցախի սահմանների և կարգավիճակի հետ:

Անդրադառնալով Ադրբեջանի նախագահի հայտարարությանը, որ Հայաստանը պետք է ճանաչի Ադրբեջանի տարածքային ամբողջականությունը, պատգամավորն արձագանքեց՝ այդպես չի կարող լինել.

«Արցախյան հակամարտությունը լուծված չէ, նոյեմբերի 9-ի հայտարարության մեջ որևէ հղում չի եղել Արցախի կարգավիճակին, ԵԱՀԿ Մինսկի համանախագահ երկրները ֆիքսել են իրենց դիրքրոշումն առ այն, որ Արցախի կարգավիճակի հարցը մնում է բաց, հետևաբար, Ալիևի հայտարարածը չի կարող տեղի ունենալ»:

Հարցին՝ հնարավո՞ր է սահմանագծման արդյունքում հայկական որոշ գյուղեր անցնեն Ադրբեջանին, Ռուբինյանը պատասխանեց.
«Գաղտնիք չէ, որ Խորհրդային Հայաստանն ունեցել է անկլավ Ադրբեջանի կողմից շրջապատված և հակառակը: Այս հարցերը կարող են դառնալ քննարկման առարկա կամ չդառնալ, կարող են ստանալ տարբեր լուծումներ»:

Իմքայլական պատգամավորը վստահեցրեց, որ ՀՀ տարածքից ստորագրվելիք փաստաթղթով որևէ տարածք չի զիջվելու հակառակորդին և ընդգծեց, որ բանավոր որևէ քննարկում տարածքի հանձնման կամ փոխանակման վերաբերյալ չի եղել:

Պատգամավորը նաև հայտնեց, որ Սյունիքում և Գեղարքունիքում իրավիճակն անփոփոխ է, ադրբեջանական զորքերը դեռևս դուրս չեն եկել ՀՀ տարածքից:

Աղբյուր` Փաստինֆո