Փաստ ինֆո

Հայաստանի սահմանների վարչատարածքային որեւէ փոփոխություն կարող է իրականացվել միայն հանրաքվեով: «Փաստինֆո»-ի հետ զրույցում ասաց ԱԺ պատգամավոր Նաիրա Զոհրաբյանը՝ ընդգծելով, որ դեմարկացիայի մասին խոսք լիներ չի կարող, քանի դեռ ունենք Արցախի չլուծված խնդիր։

«Նիկոլ Փաշինյանը խոսում է դեմարկացիայի և դելիմիտացիայի մասին, այն դեպքում, երբ դեռ Արցախի հիմնախնդիրը կարգավորված չէ, քանի դեռ Արցախի կարգավիճակի հարցը լուծված չէ, որևէ դեմարկացիայի մասին խոսք լինել չի կարող, պետք է խոսենք շփման գծի հաստատման մասին:

Իսկ թե ի՞նչ պայմանավորվածություններ վերջինս ունի և ի՞նչ պայմանավորվածություններ է փորձում իրագործել, պարզ չէ։ Տեսնում ենք, որ խորհրդարանական մեծամասնության խմբակցությունը վերջին օրերին ինչ-որ քարտեզներից է խոսում, Խորհրդային Ադրբեջանի, Խորհրդային Հայաստանի տարածքների մասին է խոսում:

Լսում եմ իմքայլական պատգամավորներին, նրանցից ոմանք ասում են՝ Հայաստանի որոշ սահմանամերձ գյուղեր նախկինում եղել են Խորհրդային Ադրբեջանում, իմ տպավորությամբ՝ նրանք շատ վատ բանի հող են նախապատրաստում »,-ասաց Զոհրաբյանը և ընդգծեց՝ չպետք է թույլ տանք, անձը, որը նոյեմբերի 9-ին միանձնյա ստորագրեց կապիտուլյացիոն համաձայնագիր, այսօր միանձնյա որոշի ՀՀ վարչատարածքային սահմանները:

Նշենք, որ «Լուսավոր Հայաստան» խմբակցությունը հայ-ադրբեջանական սահմանին դելիմիտացիա, դեմարկացիա իրականացնելու վերաբերյալ փաստաթղթի մասին ԱԺ հայտարարություն էր նախաձեռնել, որը երեկ մերժվեց խորհրդարանի կողմից:

Նաիրա Զոհրաբյանի խոսքով, եթե անգամ բոլոր ընդդիմադիրներն էլ ներկա լինեին, միևնույնն է, անհրաժեշտ ձայն չէր հավաքվելու, քանի որ «Իմ քայլը » չէր մասնակցում քվեարկությանը:

Նախագիծը ներկայացնելիս ԼՀԿ ղեկավար Էդմոն Մարուքյանը նշել էր, որ այս նախագիծը հետագա սերունդներին հիմք կտա, որպեսզի դիմեն միջազգային ատյաններ և վիճարկեն՝ ՀՀ տարածքների հետ կապված խնդիրը:

Մեր դիտարկմանը, որ նախագծի մերժումով, սակայն դրա հնարավորությունն էլ նվազեցվեց, Զոհրաբյանն արձագանքեց, որ սա ավելի գլոբալ խնդիր է, իսկ ապագայում ամեն ինչ հնարավոր է, բայց լինելու է սարսափելի բարդ.

« Հիմա, երբ ինչ-որ մեկն ասում է, ընտրեք ինձ և ես վերադարձնելու եմ Շուշին, ես մեծ վերապահում ունեմ նման հայտարարությունների վերաբերյալ: Իհարկե, մենք պետք է ունենանք Շուշին, Հադրութը, հայրենիքի մնացյալ հատվածը վերադարձնելու հարցը, բայց հասկանում ենք, որ դա շատ դժվար է լինելու: Եթե որևէ բնակավայր Հայաստանից հանձնվի այն պատճառաբանությամբ, որ Ալիևի գրպանում դրված քարտեզով դա նախկինում եղել է Ադրբեջանակն ԽՍՀՄ տարածք, ապա մոռացեք, որ երբևէ հնարավոր է վերադարձնել: Կամ դա ի՞նչ հոգեբանություն է, հանձնենք, հետո կվերադարձնենք »,-ասաց Զոհրաբյանը:

Դիտարկմանը, որ եթե մամուլում չհչապարակվեր նոր ստորագրվելիք փաստաթուղթը, ապա հանրությունը չէր իմանա դրա առկայության մասին մինչեւ փաստ դառնալը՝ պատգամավորն ասաց.

«Իսկ որ հանրությունն իմացավ, ի՞նչ փոխվեց դրանից, քանի՞ մարդ մենք երեկ տեսանք Հրապարակում: Ես չեմ կարող ադեկվատ բացատրություն գտնել հանրության այս ապատիկ, դեպրեսիվ վիճակին, երբ հայրենիք են հանձնում, իսկ հանրությունը լուռ է»։

Անդրադառնալով ԱԺ-ում Նիկոլ Փաշինյանի արված հայտարարությանը, որ կան Սովետական Ադրբեջանին պատկանած տարածքներ, որոնք գտնվում են ՀՀ զինված ուժերի վերահսկողության տակ՝ Զոհրաբյանն ասաց.

«Ես չգիտեմ՝ ինքն ի՞նչ տարածքներ նկատի ունի, երբ մենք ասում ենք, որ վտանգված են Տավուշի որոշ գյուղեր, վտանգված է Տիգրանաշենը, մեզ մեղադրում են ադրբեջանական ջրաղացին ջուր լցնելու մեջ, հիմա թող Փաշինյանը նշի այն բնակավայրերը, որոնք նախկինում եղել են ադրբեջանական ԽՍՀՄ-ի տարածք: Արծվաշենը մշտապես եղել է Հայաստանի ԽՍՀՄ տարածքում, թող մի հատ Արծվաշենը վերադարձնեն, Ալիևից Արծվաշենն ուզեք, հետո նոր մտածեք այն տարածքների մասին,որոնք Ալիևի անձնական քարտեզով, եղել են Ադրբեջանի կազմում: Ի վերջո, Խորհրդային տարիներին մի քանի քարտեզ է եղել, ինչու՞ են իրենք վերցնում հատկապես այն քարտեզը,որը դուր է գալի Ալիևին և առաջնորդվում են այդ քարտեզով »,-ասաց Զոհրաբյանը:

Պատգամավորը հայտարարեց՝ պետք է մի կողմ դնել կուսակցական տարաձայնությունները, ընդդիմության միջև որևէ տարաձայնություն չպետք է լինի.

«Պետք է հասկանանք, որ մեզ համար հունիսի 20-ի ընտրությունները հայրենական պատերազմ է, Հայաստանի լինելիության խնդիրն է դրված, բոլորս պետք է լինենք առաջնագծում: Ինձ համար կարևոր չէ՝ թե Նիկոլի դեմ պայքարողը Ռոբերտ Քոչարյանի դաշինքում է, ՀՀԿ-Հայրենիք դաշինքում է, ԲՀԿ-ում, ԼՀԿ-ում, թե ՀԱԿ-ում, եթե իրենք իրապես պայքարում են Նիկոլի դեմ, նրանք բոլորը պետք է լինեն առաջնագծում, իրար դեմ չպետք է մարտնչեն:Հիմա նկատում են, որ ընդդիմադիրները, իրենց հիմնական թիրախը թողած, զբաղված են միմյանց հաշվին ինքնահաստատվելով: Դա ջուր է լցնում Նիկոլի և նիկոլականության ջրաղացին: Հունիսի 20-ը պետք է հռչակենք Հայրենական պատերազմի օր, հայրենիքը փրկելու օր և բոլորս կռվենք առաջնագծում՝ որպես զինվորներ»,-ասաց Զոհրաբյանը:

Աղբյուր` Փաստինֆո