Փաստ ինֆո

Արցախի Ազգային Ժողովի 3  խմբակցություն պահանջում են նախագահ Արայիկ Հարությունյանի հրաժարականը: Այս մասին «Փաստինֆո»-ի հետ զրույցում ասաց Արցախի ԱԺ «Արդարություն» կուսակցության պատգամավոր Մետաքսե Հակոբյանը՝ նշելով, որ սահմանադրական արգելքն արդեն վերացել է:

Հիշեցնենք, որ Արայիկ Հարությունյանի հրաժարականի հարցը Արցախի խմբակցությունները բարձրացրել են կապիտուլյացիայի ակտի ստորագրումից հետո՝ նոյեմբերի 12-ին։ Արցախի ԱԺ 5 խմբակցությունից 4-ը, բացի «Ազատ Հայրենիք» խմբակցության, որը Արայիկ Հարությունյանի կուսակցությունն է, ստորագրել են համաձայնագիր, որով պահանջում էին Արայիկ Հարությունյանի հրաժարականը:
«Այն ժամանակ Հարությունյանի նախագահության մեկ տարին չէր լրացել, իսկ Սահմանադրությամբ, նախագահի հրաժարականը կարելի է պահանջել իր պաշտոնավարման մեկ տարին լրանալուց հետո: Դրան հետևեց Հարությունյանի դեկտեմբերի 16-ի սրտաճմլիկ հայտարարությունը, որտեղ նշեց, որ երբ զգա հանրային պահանջ՝ հրաժարական կներկայացնի: Հարությունը նաև խոսք էր տվել, որ թողնելու է «Ազատ Հայրենիք» կուսակցության ղեկավարի պաշտոնը: Նա այդ օրը բազմաթիվ խոստումներ է տվել, որոնք այդպես էլ չկատարեց»,- շեշտեց Հակոբյանը:

Նրա փոխանցմամբ՝ ՀՀ վարչապետը Արցախում երկու նախարար է նշանակել ` աշխատանքի, սոցիալական և միգրացիայի հարցերի և տարածքային կառավարման և ենթակառուցվածքների նախարարներին, որոնք պետք է լրջագույն աշխատանք կատարեին:
«Այս 7 ամիսների ընթացում ոչ միայն ոչինչ չարեցին, այլև անհասանելի են դարձել և՛ բնակչության, և՛ պատգամավորների համար: Հնարավոր չէ նրանց հետ կապ հաստատել կամ որևէ գործառույթ իրականացնել: Այս ամիսների ընթացքում Նիկոլ Փաշինյանի համակիրները Հայաստանից լցվել են այդ նախարարությունները, և իրականացնում են ինչ-որ անհայտ գործառույթներ»,- ասաց պատգամավորը:

Ըստ նրա՝ Արայիկ Հարությունյանը մարտ ամսին ստորագրել է մի հրամանագիր, ըստ որի մինչև 2022 թվականի մարտի 1-ը Արցախում տեղի չեն ունենալու տարածքային ինքնակառավարման մարմինների ընտրություններ:

«Այս հրամանով Հարությունյանը ապահովագրեց իրեն և այդ ընթացքում, նա և իր թիմակիցները առիթը չեն կորցնում՝ մարդկանց մոտ սերմանելու, թե Արցախում վտանգավոր է անցկացնել ընտրություններ, ինչը իրականությանը չի համապատասխանում: Արցախում միշտ եղել է ընտրությունների խնդիր այնքանով, որ Ադրբեջանը միշտ դեմ է արտահայտվել և նույնը կլիներ հիմա, սակայն Բաքվի հորդորները ոչ ոք չէր լսում, հիմա էլ կարելի էր դա անել», - նկատեց նա:

Մայիսի 20-ի հայտարարությամբ՝ ԱԺ խորհրդարանական ընդդիմադիր խմբակցությունները հիշեցրեցին Հարությունյանին, որ իր պաշտոնավորման մեկ տարին լրանում է:

«Պետք է նշեմ, որ հանրային պահանջ կա և այն շատ մեծ է, ավելի մեծ, քան Հայաստանի Հանրապետությունում: 10 քաղաքացուց 9-ը պահանջում են Հարությունյանի հրաժարականը, իսկ յուրաքանչյուր 10-րդը պարզապես իր կերակրամանից սնվում է, կամ իր կողքը կանգնած իշխանական թևից է: Եվ նրանք այժմ ամեն ինչ անում են, որպեսզի Հայաստանում վերարտադրվի Նիկոլ Փաշինյանի հանցավոր ռեժիմը, որպեսզի իրենք ևս ամուր մնան իրենց դիրքերում: Քանի որ այսօր Արցախը այս առումով իրենց համար շատ բարենպաստ է՝ այստեղ շինարարություն է իրականացվում, և կա գումար հափշտակելու մեծ հնարավորություն: Մենք երեկ 4 խմբակցություններով նորից հավաքվեցինք, որպեսզի անենք հայտարարություն պահանջելով Հարությունյանի հրաժարականը: «Միասնական Հայրենիքը» կարծես թե չմիացավ, քանի որ իրենց խմբակցության ղեկավարը ասաց, որ իրենց ժամանակ է պետք, բայց մինչև այսօր նրանցից որևէ տեղեկություն չկա», - շեշտեց Հակոբյանը:

Անի Մշեցյան

Աղբյուր` Փաստինֆո