Փաստ ինֆո

Տիգրանաշենը և դրա հարակից տարածքը՝ մոտավորապես 800 հեկտար, ամբողջությամբ ներառում է Երևան-Մեղրի միջպետական ավտոճանապարհի մի մասը և եթե այս տարածքն անցնի Ադրբեջանի վերահսկողության տակ, ապա մենք ուղղակի իրավունք չենք ունենա երթևեկել այդ հատվածով, անվտանգային լուրջ խնդիրներ ենք ունենալու: Այս մասին «Փաստինֆո»-ի հետ զրույցում ասաց ՍԴ աշխատակազմի նախկին ղեկավար, Վայոց Ձորի նախկին մարզպետ Էդգար Ղազարյանը:

Ինչպես արդեն հայտնի է, հրաժարական ներկայացրած եւ վարչապետի պաշտոնը ժամանակավորապես իրականացնող Նիկոլ Փաշինյանը հաստատել է, որ պատրաստվում է նոր փաստաթուղթ ստորագրել, որի բովանդակությունը գաղտնի է պահում։ Իսկ փաստաթղթի գոյության մասին հայտարարել էր Վատիկանում ՀՀ նախկին դեսպան Միքայել Մինասյանը՝ հրապարակելով փաստաթղթից մի հատված՝ նշելով. «Տավուշի մարզի 5 գյուղ և Արարատի մարզի մեկ գյուղը Ադրբեջանին հանձնելը Նիկոլը քննարկման առարկա է դարձրել»։

Ըստ շրջանառվող փաստաթղթի, Հայաստանը պարտավորվում է Ադրբեջանին հանձնել Արարատի մարզում գտնվող Տիգրանաշեն գյուղը, որը ԽՍՀՄ-ի օրոք եղել է անկլավ։

Էդգար Ղազարյանն ընդգծել է, որ այս դեպքում անվտանգային լուրջ խնդիրներ կառաջանա Հայաստանի համար, քանի որ հակառակորդի վերահսկողության տակ է անցնելու միջպետական ճանապարհ ներառող կարևոր նշանակության տարածք։

«Ես Վայքից եմ և այլևս Վայք գնալու հնարավորություն այդ ճանապարհով չեմ ունենալու, կամ կունենամ Ադրբեջանի հայեցողությամբ, եթե ունենամ ադրբեջանական վիզա, քանի որ սահմանն անցնելուց այն արդեն դառնալու է Ադրբեջանի վարչական տարածք և պետք է լինելու Ադրբեջանի իշխանության համաձայնությունը, ու այդպես ՀՀ քաղաքացիները,եթե օրինակ ցանկանան գնալ Ջերմուկ, պետք է ունենան Ադրբեջանի համաձայնությունը : Ամբողջ Վայոց Ձորը, Սյունիքը, Արցախը կտրվում է: Այդ ճանապարհով հնարավոր չի լինի ռազմական տեխնիկա, զենք և զինվորականներին տեղափոխել, Ադրբեջանը հաստատ թույլ չի տա: Դրանից ավել ի՞նչ անվտանգային խնդիր կարող է լինել, երբ դու քո երկրի միջպետական ճանապարհ ներառող տարածքը վերցնում ու նվիրում ես թշնամուն»,-ասաց Էդգար Ղազարյանը:

Հաշվի առնելով, որ փաստաթուղթը ստորագրել է վարչապետի ժամանակավոր պաշտոնակատարը՝ Էդգար Ղազարյանը նշել է, որ հետագայում այն վիճարկելու հնարավորություն կունենանք.

«Նիկոլ Փաշինյանը հրաժարականից հետո պաշտոնավարելու իրավունք չուներ: Նա հիմա ապօրինի է պաշտոնավարում և ոչ միայն շրջանառվող կապիտուլյացիոն համաձայնագրի նախագիծը ստորագրելու լիազորություն չուներ, այլ առհասարակ որևէ լիազորություն, որը կապված է վարչապետի գործունեության հետ, նա իրավասու չէր կատարել»:

Զրուցակիցը նկատեց, որ մինչ այս ստորագրված եռակողմ համաձայնագրերը չեն հանդիսանում իրավական ակտ, դրանք վերնագրված են հայտարարություն և չեն հանդիսանում միջազգային պայմանագիր, որն ունի օրենքով, Սահմանդրությամբ պահանջվող վավերացման ընթացակարգ: «Սա ընդամենը երեք պետությունների ղեկավարների, պաշտոնատար անձանց հայտարարություն է: Քանի Նիկոլ Փաշինյանը շարունակում է մնալ իշխանության ղեկին, բնականաբար, նա կատարում է այն պարտականությունները, որի տակ ստորագրել է, իսկ եթե իշխանության է գալիս այլ անձ, հայտարարությունն այլևս չի կարող դիտարկվել Հայաստանի պարտավորություն և կարող է նորովի բանակցվել դրա վերաբերյալ»,-ասաց Էդգար Ղազարյանը՝ ավելացնելով. «եթե իրավապահ մարմինները կատարեն իրենց գործառույթները և հեռացնենք Փաշինյանին պաշտոնից, ընտրվի նոր վարչապետ, ապա բոլոր հանգամանքները կփոխվեն»։

«Այն գործողությունները, որոնց դեպքում ժամանակի անիվը հնարավոր չէ պտտել, դրանց հետ պետք է հաշվի նստենք: Այլևս Քելբաջարը ոչ մեկը Հայաստանին չի վերադարձնելու, բայց այն, ինչ դեռ չի կատարվել, բայց ամրագրված է կապիտուլյացիոն հայտարարություններով, դրանք հնարավոր է խափանել և նորովի բանակցել դրանց վերաբերյալ»,-ասաց Ղազարյանը:

Դիտարկմանը, որ Ադրբեջանը դեռևս չի իրացրել նոյեմբերի 9-ի համաձայնագրով սահմանված պարտավորությունները, չի վերադարձրել հայ գերիներին, իսկ հայկական կողմը նոր փաստաթուղթ է պատրաստվում ստորագրել, զրուցակիցն արձագանքեց.

«Նոյեմբերի 9-ի համաձայնագրում հստակ գրված է՝ ռազմագերիներ և այլ պահվող անձիք, իսկ Ադրբեջանն ասում է՝ ռազմագերիներին փոխանցել եմ, իսկ մյուսներն այլ կարգավիճակ ունեն և չի վերադարձնում: Ստացվում է Ադրբեջանը ստորագրել է համաձայնագիր, բայց չի կատարում իր պարտավորությունները, իսկ Փաշինյանը ստորագրել է և վայրկյանների ճշտությամբ կատարում է բոլոր պարտավորությունները: Դրա համար էլ ասում ենք, որ նրա ամեն օր ավել իշխանության մնալը, դա աղետ է»։

Աղբյուր` Փաստինֆո