Փաստ ինֆո

Եթե Նիկոլ Փաշինյանը օրինական ճանապարհով դառնար վարչապետի ժամանակավոր պաշտոնակատար, ապա մենք կարող էինք քննարկել այն հարցը՝ արդյոք նա իրավունք ունի ստորագրել Ադրբեջանի հետ այսքան կարևոր փաստաթուղթ, թե ոչ, սակայն նա զավթել է այդ պաշտոնը: Այս մասին «Փաստինֆո»-ի հետ զրույցում ասաց Մարդու իրավունքների առաջին պաշտպան Լարիսա Ալավերդյանը:

Նրա համոզմամբ՝ մեր օրենսդրությամբ Փաշինյանը իրավունք չուներ ինքն իրեն հռչակել վարչապետի ժամանակավոր պաշտոնակատար:

«Ուզում են նաև անդրադառնալ Փաշինյանի այն հայտարարությանը, որ փաստաթուղթը չի հրապարակվելու, քանի որ այն աշխատանքային է, նա մոռանում է երեք կարևոր սկզբունք: Նախ և առաջ, եթե նա պատրաստվում է ստորագրել երկկողմ կամ եռակողմ փաստաթուղթ, ապա դա ոչ թե սովորական փաստաթուղթ է, այլ միջազգային պայմանագիր: Այսպիսի պայմանագիրը պետք է անցնի Սահմանադրական դատարանով և Ազգային Ժողովով: Այսինքն, այսպիսի կարևոր փաստաթղթը գաղտնիության պայմաններում ստորագրելը հակաօրինական է»,- շեշտել է ՀՀ առաջին ՄԻՊ-ը:

Բացի այդ՝ եթե ստորագրվելիք փաստաթուղթը վերաբերում է ՀՀ տարածքներին, ապա այս պայմանագիրը կյանքի չի կարող կոչվել, քանի դեռ այդ հարցով չի անցկացվել համաժողովրդական հանրաքվե, ինչը մեր Սահմանադրության պահանջն է:

«Այսինքն, խախտվում է երեք սկզբունք` վարչապետի ժամանակավոր պաշտոնակատարի պաշտոնը զավթված է, միջազգային պայմանագիրը չի կարող ստորագրվել չանցնելով ՍԴ և Ազգային Ժողովի միջով, և եթե խոսքը գնում է տարածքների մասին պետք է լինի հանրաքվե: Միայն հանրաքվեից հետո կարող է այսպիսի կարևոր փաստաթուղթը ստորագրվել,- ընդգծել է Ալավերդյանը:

ՀՀ առաջին ՄԻՊ-ը շեշտել է, որ Փաշինյանը օգտվում է նրանից, որ ժողովուրդը ընկճված է և լռությունն ընկալում է որպես համաձայնություն:

«Այս պահի դրությամբ Փաշինյանը կանի ամեն ինչ, որպեսզի իրեն իշխանության բերած ուժերը թույլ չտան նրա պաշտոնանկությունը: Քանի որ, իմ խորին համոզմամբ, սա ամբողջ ծրագիրը չէ, Փաշինյանը դեռ չի իրականացրել իր բոլոր պարտավորությունները»,- եզրափակել է Ալավերդյանը:

Հեղինակ՝ Անի Մշեցյան

Աղբյուր` Փաստինֆո