Փաստ ինֆո

Մենք այլևս չենք կարող նստել տներում: Մենք պետք է այստեղ մնանք այնքան, մինչև մեր երկրից հեռանան դավաճանները, նրանք, ովքեր հանձնում են մեր երկիրը։ Այս մասին կառավարության շենքի մոտ հայտարարել է զոհված զինվորի մայր, հասարակական գործիչ Կարին Տոնոյանը:

«Որպես մայր, որը 5.000 զավակ է կորցրել, մայր, որի 11.000 զավակները վիրավորվել են՝ ուզում եմ դիմել այն մայրերին, որոնց երեխաները իրենց կողքին են, կամ սահմանին կանգնած են և որոնց նվաստացնելու հնարավորություն է տվել գործող վարչապետի պաշտոնակատարը: Մեր զավակները զոհվել են, բայց նրանք հպարտ են:

Ես նայեցի այդ տեսանյութը և պարզապես խելագարված եմ, երբեք չէի հավատա, որ հայ զինվորին կդնեն նման իրավիճակի մեջ: Եվ հիմա ընդամենը պատվախնդրության կոչ եմ անում, հայ զինվորին դրել են այդ վիճակում, նրանց թույլ չեն տալիս կրակել, և եթե մենք այսօր այստեղ չենք հավաքվում և չենք ասում զինվորներին, որ ձեր թիկունքում ենք, ուրեմն մենք էլ ենք կոտրում նրանց»,- հայտարարել է Կարին Տոնոյանը եւ ընդգծել՝ «արդյոք 2,5 մլն ժողովուրդը պետք է գերի մնա մի ստախոսի, կիսախելագարի, կամ փայլուն իր դերը կատարող դերասան դավաճանի ձեռքին»։

Կ.Տոնոյանը կոչ է արել կազմակերպել Հայաստանի սահմանների պաշտպանության կոմիտե:

«Ես հիմա էլ եմ այս կոչով դիմում: Մենք այս ամենը կազմակերպել ենք և հստակ մեր գործողությունները կանոնակարգելու ենք: Մենք բոլորս պետք է միասին լինենք, սահմանում կանգնած են մեր զավակները: Կոչ եմ անում բոլորին, մենք այլևս չենք կարող նստել տներում: Մենք պետք է այստեղ մնանք այնքան, մինչև մեր երկրից չհեռանան դավաճանները, նրանք ովքեր հանձնում են մեր երկիրը և թույլ չեն տալիս մեր զավակներին անգամ պաշտպանվել: Մենք այստեղ սպասելու ենք նրանց, ովքեր կորոշեն միանալ: Եկեք լուծենք այս հարցը այսօր, քանի որ յուրաքանչյուր վայրկյան մեզանից հող և զոհ է պահանջելու»,- եզրափակեց Տոնոյանը:

Աղբյուր` Փաստինֆո