Փաստ ինֆո

500 ադրբեջանցի զինվորի ոչնչացնելն այս պահին մեր զինված ուժերի համար խնդիր չէ, բայց եթե լոբբինգ անենք, որ 500 զինվորին ոչնչացնեն, դա նշանակում է՝ Հայաստանը պատերազմից 6 ամիս անց կրկին ներքաշվի նոր պատերազմի մեջ արդեն ՀՀ տարածքում։

Լրագրողների հետ զրույցի ժամանակ այս մասին ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը։

«Եթե կա տարբերակ բանակցություններից այս վիճակից դուրս գալու, դա լավ տարբերակ է։ Եթե դա չստացվի, այդ պատերազմը միշտ կա»,-ասաց պատգամավորը։

Հարցին՝ ինչու՞ Նիկոլ Փաշինյանը մինչ այս չէր խոսում այդ փաստաթղթի մասին, որի շուրջ բանակցություններ եղել են և եթե Ադրբեջանը պայմանավորվածությունները պահի, նա ստորագրելու է այդ փաստաթուղթը, Էդմոն Մարուքյանը նկատեց՝ Նիկոլ Փաշինյանը մտածում է, որ ինքը ժողովուրդն է և այն, ինչ ինքը գիտի, ժողովուրդը գիտի և ժողովրդից թաքուն չէ. «Պետք է նրան սթափեցնել, որ ինքը ժողովուրդը չէ և ժողովուրդը չգիտի՝ ինքն ինչ է բանակցում։ Հերթական անգամ ժողովրդի թիկունքում փաստաթուղթ է բանակցվել, որից տեղյակ չէ ո՛չ ժողովուրդը, ո՛չ ժողովրդի կողմից ընտրված որևէ ներկայացուցիչ։ Ուզում ենք նիստ հրավիրել, որպեսզի իրենց այստեղ բերենք, ստանանք այդ տեղեկատվությունը և պահանջենք ժողովրդի անունից, որ իրենք չեն կարող ժողովրդի անունից ինչ-որ բան բանակցել, ինչ-որ բան ստորագրել ու միանձնյա պնդել, որ այդ ամենը 100 տոկոսով բխում է Հայաստանի շահերից»,-ասաց Էդմոն Մարուքյանը։

Աղբյուր` Փաստինֆո