Փաստ ինֆո

Ինչ որ պետք է, այն էլ բանակցում ենք՝ դեռ անցյալ տարի աբիսողոմական դեմքով հայտարարում էր ԱԺ-ում՝ վարչապետի ժ/պ-ն։ Այսօր, նույն կերպ թաքուն ու գաղտնի ողջ ազգի թիկունքում ադրբեջանի հետ Հայաստանի անունից ինչ-որ փաստաթուղթ է պատրաստվում ստորագրել ժ/պ-ն, թեպետ, դրա իրավունքը չունի։ Արդեն իսկ մասնագետները բարձրաձայնում են՝ նա իրավասու չէ ստորագրել Հայաստանի և Ադրբեջանի միջև դելիմիտացիայի վերաբերյալ հայ-ռուս-ադրբեջանական եռակողմ հայտարարությունը, այն էլ՝ ներկայանալով որպես ՀՀ վարչապետ։

Սակայն, նա հերթական կառավարության հերթական նիստի ժամանակ այդ մասին հայտարարելով, նույնիսկ գնահատական փորձեց տալ տվյալ փաստաթղթին, այն համարելով Հայաստանի համար շահավետ։ Հարց է ծագում, եթե այն ՀՀ-ի համար շահավետ է, հապա ինչու՞ ԱԳՆ-ն տվյալ փաստաթղթից անտեղյակ է, ավելին, ըստ որոշ աղբյուրների՝ արտգործնախարար Արա Այվազյանն իր հրաժարականն է պատրաստում։ ՀՀ նախագահը ևս անտեղյակ է հիշյալ փաստաթղթից, տեղեկություն չի ունեցել նաև ՀՀ ԱԺ պաշտպանության և անվտանգության հարցերի մշտական հանձնաժողովի նախագահը, իսկ սա նշանակում է՝ բացարձակ գաղտնիության պայմաններում Հայաստանի հանդեպ հերթական դավադրությունն է նախապատրաստվում, ինչի մասին, ի դեպ, ավելի վաղ Միքայել Մինասյանն էր հրապարակել՝ ներկայացնելով փաստաթղթից մի հատված, ըստ որի՝ Տավուշի մարզի գյուղեր /7-8/ և Արարատի մարզի մեկ գյուղը /Տիգրանաշենը/ Ադրբեջանին հանձնելը Նիկոլը քննարկման առարկա է դարձրել։

Նկատենք, որ այսօրվա կառավարության նիստին վարչապետի պաշտոնակատար Փաշինյանն ուղղակի հայտարարել է, որ Եթե Ադրբեջանը պայմանավորվածություններն իրագործի, փաստաթուղթը ստորագրելու է։

Ի՞նչ է սա նշանակում և ո՞վ է լիազորություն տվել սույն ժ/պ-ին ողջ ազգի փոխարեն որոշումներ կայացնի, այն էլ՝ այսօր, երբ իր լեգիտիմությունը րոպե առ րոպե է նվազում։
Եթե այդքան շահեկան փաստաթուղթ է, թող կառավարությունը հրապարակի, ինչու՞ է լուռ, ի՞նչ դավ է նյութվում կրկին։ Սյունիքում ադրբեջանցի զինվորները առաջ են եկել ու հետ գնալու միտք չունեն արդեն մեկ շաբաթից ավելի, արևելյան հատվածում կատարվող խայտառակությունը երեկ բոլորս տեսանք, երբ հայ զինվորին թուրքի լամուկը հրելով քշում էր ու մեր զինվորը ինքնապաշտպանվելու քայլ իսկ չէր անում։

Ի դեպ, սա նախադեպային տեսարան էր, որպիսին չէինք տեսել անցած 30 տարիներին։ Պարտությունը՝ իր հերթին, սակայն, այնպիսի տպավորություն կա, կարծես մեր զինվորներն իսպառ բարձիթողության մատնված վիճակում են։

«Պետք է առնվազն հրապարակվեն փաստաթղթի բոլոր այն դրույթները, որոնք պատկերացում են տալիս՝ ինչի մասին է իրականում խոսքը․ Ադրբեջանի հետ սահմանազատումն ուղղակիորեն վերաբերում է բոլորիս, ՀՀ-ում ապրող յուրաքանչյուր մարդու, ողջ հայ ժողովրդի կենսական իրավունքներին՝ կյանքի ու գոյության, ազգային ու անձնական արժանապատվության, հոգեկան անդորրի ու ֆիզիկական անվտանգության, տեղեկացված լինելու ու շատ այլ իրավունքների»՝ այսօր հայտարարել է Հայաստանի օմբուդսմեն Արման Թաթոյանը։

Կհրապարակվի՝ չի հրապարակվի, ընդհանրապես, ի՞նչ փաստաթղթի մասին է խոսքը, ինչու՞ է այն քննարկման առարկա դարձել՝ բնավ չի հետաքրքրում օրենսդիր և գործադիր մարմնում իրենց անգործության համար վարձատրվող պաշտոնյաներին։

ՀՀ էկոնոմիկայի նախարարի պաշտոնակատար Վահան Քերոբյանն, օրինակ, տեղյակ չէ, թե ինչ փաստաթուղթ է պատրաստվում ստորագրել վարչապետի ժ/պ-ն , բայց լրագրողներին նա համարձակ վստահեցնում է, թե՝ «Հողերի զիջման մասին խոսք չկա» ։

ՈՒշագրավ է, որ ՀՀ կառավարության բարձրաստիճան պաշտոնյայի խոսքերի հիմքում հավատն է՝ Մինասյանին չի հավատում, իսկ Փաշինյանին, փաստորեն, անվերապահորեն, կարելի է ասել՝ կուրորեն է հավատում, դրա համար էլ՝ իր չտեսած, չկարդացած փաստաթղթի մասին ասում է՝ «Ըստ փաստաթղթի՝ մեր կողմից ոչ մի զիջում չի նախատեսվում»։

Այն, որ ժողովրդից գաղտնի ու ծածուկ գործընթաց է իրականացնում ՀՀ ժ/պ-ն, կառավարության տվյալ անդամին բնավ չի մտահոգում, ավելին նա պնդում է, թե՝ ունեցած տեղեկատվությունը իրեն որպես հայերնասեր մարդու, բավարարում է:

Թերևս, իր այդ «հայրենասիրությունը» կապիտուլյանտին հավատալու մե՞ջ է։ Փաստորեն հանձին Քերոբյանի՝ Փաշինյանն ունի կառավարության իր արփիդավոյանը, որը բյուջեի հաշվետվության ժամանակ ասել էր՝ նույնիսկ ճերմակ թղթի տակ պատրաստ է ստորագրել, եթե այն ներկայացրել է Փաշինյանը։ Հիմա՝ այս մեկն էլ՝ առանց տեսնելու, առանց բովանդակությանը ծանոթ լինելու հավատում է Փաշինյանին՝ վստահելով նրան իր և իր ընտանիքի անվտանգությունը։

Աղբյուր` Փաստինֆո