Փաստ ինֆո

Մեղավոր ենք բոլորս, որ մինչ օրս հանդուրժել ենք, որ այս իշխանությունը զավթած, պարտված, թուրքի դիմաց կզած իշխանությունները շարունակում են մնալ որպես իշխանություն։ Այս մասին հայտարարել է «Պատիվ ունեմ» դաշինքի ղեկավար Արթուր Վանեցյանը։ 

«Պետք է բոլորս համախմբվեինք, հասնեինք նրան, որ մեր քաղաքացիները դուրս գային փողոց, ընդվզեին։ Մեր պահանջը մեկն է՝ մեր երկրի, մեր հայրենիքի փրկությունը»,- նշել է Արթուր Վանեցյանը՝ հավելելով, որ սեպտեմբերի 27-ից սկսած այս իշխանությունները՝ յուրաքանչյուր օր խաբելով, ստելով, մանիպուլացնելով մեզ բերեցին հասցրին մի իրավիճակի, որ այսօր ունենք Արցախի Հանրապետության տարածքի շուրջ 75 տոկոսի կորուստ, ունենք ՀՀ տարածքում՝ պաշտոնական աղբյուրների համաձայն 500-ից ավել ադրբեջանցիներ, որոնք անարգել մտել են Սյունիքի տարածք, Գեղարքունիքի մարզի տարածք։

Նրա խոսքով՝ եթե ժողովուրդը գիտակցի, թե իրականում ինչ է կատարվում մեր երկրում, ապա ոչ թե պետք է կանգնեն և ակցիա անեն, այլ՝ հավաքվենք, գնանք և վերջ տանք այս իշխանություններին, որովհետև այս իշխանությունների՝ մեկ օր ավել իշխանության ղեկին մնալն ուղիղ սպառնալիք է ՀՀ ազգային անվտանգությանը։

«Այսօր պայքար չէ հանուն ինչ-որ մի բանի, այսօր բառացիորեն պայքար է մեր ապագայի, մեր պետության, մեր պետականության պահպանման համար։ Այսօր մենք կանգնած ենք իրական բնաջնջման առջև։ Մենք էլի չենք կարողանում բացատրել ժողովրդի մեծ զանգվածին, որ իրենք պետք է ոչ թե տնից աջակցեն, տնից ասեն, որ այս ազգադավ իշխանությունները քայքայում են, տանում են երկիրը կործանման, այլ՝ դուրս գան փողոց, գան կանգնեն մեր կողքը և կարողանան ժողովրդի ճնշման ներքո անցնել մեր երկրի ազատագրմանը »,- նշեց Վանեցյանը։

Ինչ վերաբերում է արտահերթ խորհրդարանական ընտրությունների անցկացմանը, ապա Վանեցյանը նշեց, որ ցավոք սրտի հասել են այդ ծուղակին, մեկ ամիս է մնացել՝ նշանակված արտահերթ խորհրդարանական ընտրություններին։

«Ընտրություններից մեկ ամիս առաջ, երբ պետք է ձևավորվի նոր Խորհրդարան և նոր իշխանություն, այս իշխանությունները փորձում են արագ-արագ ինչ-որ պայմանավորվածություններ ձեռք բերեն, ինչ-որ փաստաթղթերի տակ, որոնց հրապարակված մասը համարում եմ, որ դա իրականությանը չհամապատասխանող հատված է։ Մեր համոզմամբ՝ կա նաև քողարկված մաս»,- նշեց Վանեցյանը։

Աղբյուր` Փաստինֆո