Փաստ ինֆո

Մենք հայտարարել ենք, որ ստացել ենք այդպիսի փաստաթուղթ, բայց այն քննարկելու համար կա մի շատ կարևոր նախապայման, այն է՝ Ադրբեջանի զինված ուժերն ամբողջությամբ պետք է լքեն ՀՀ սուվերեն տարածքը։ ԱԺ-ում այս մասին ասաց ՀՀ անվտանգության խորհրդի քարտուղար Արմեն Գրիգորյանը։

«ԱԽ առաջին նիստում մենք ունեցել ենք մեկ շատ կարևոր ռազմավարական որոշում, որ պետք է ինչքան հնարավոր է մեր բոլոր գործողությունները հրապարակային կատարենք։ Ամբողջովին մեր գործողությունների տրամաբանությունը պահել ենք այդ ռազմավարության շրջանակներում։ Մենք առավելագույնս հրապարակային ենք աշխատել։ Այս փաստաթղթի մասին երեկ խոսել ենք արդեն, նշել ենք, որ նման փաստաթուղթ կա։ Այս փաստաթղթի վերաբերյալ քննարկումներ դեռ կոնկրետ չենք սկսել, որովհետև մինչև այս փաստաթղթի մասին քննարկումներ սկսելը՝ շատ կարևոր է, որպեսզի Ադրբեջանի զինված ուժերը լքեն ՀՀ սուվերեն տարածքը։ Այդ է պատճառը, որ ավելի կոնկրետ հաղորդակցություն հանրության հետ չի եղել։ Միակ պատճառը դա է»,-ասաց ԱԽ քարտուղարը։
Վերջինս նշեց, որ երբ այս գործընթացը սկսվեց, միջազգային կարևոր գործընթաց են սկսել, որի արդյունքում հստակ միջազգային կոնսեսուս է ձևավորվել, որ Ադրբեջանի զինված ուժերը պետք է լքեն Հայաստանի տարածքը։

«Մարդիկ երևի ցայտնոտի մեջ են ընկնում, որ մենք հնարավորություն ունենք դիվանագիտական ճանապարհով այս խնդիրը լուծել։ Այս գործողությունները նպատակ են ունեցել սպառնալիք ստեղծել ՀՀ-ում սպասվող ընտրություններին, և ինչքան հնարավորությունն ավելի է մեծանում հնարավոր խաղաղ լուծման, այնքան ավելի շատ փորձեր են կատարվում տորպեդահարելու այդ գործընթացը։ Եթե չկարողանանք խաղաղ, դիվանագիտական ճանապարհով լուծել այս խնդիրը, ապա ՀՀ-ն իրեն իրավունք է վերապահում գործարկել այլ մեխանիզմներ, որպեսզի կարողանանք կարգավորել այս խնդիրը»,-ասաց Արմեն Գրիգորյանը։

Աղբյուր` Փաստինֆո