Փաստ ինֆո

Մեկնարկեց ԱԺ արտահերթ նիստը։ «Լուսավոր Հայաստան» խմբակցությունը խորհրդարանի քննարկմանն է ներկայացրել հայտարարության նախագիծ։

Խմբակցության ղեկավար Էդմոն Մարուքյանն ընթերցեց հայտարարության տեքստը.

«Ելնելով ՀՀ-ում տիրող լարված իրադրությունից, որը ծագել է 2021 թվականի մայիսի 12-ից, երբ Ադրբեջանի զինված ուժերի ներկայացուցիչները ՄԱԿ-ի կանոնադրությամբ ամրագրված միջազգային իրավունքի հինարար սկզբունքների կոպիտ խախտմամբ մուտք են գործել ՀՀ Սյունիքի և Գեղարքունիքի մարզերի տարածքներ ու մինչ այս պահը մի քանի հարյուր զինվորական գտնվում է ՀՀ նշված տարածքներում։

Տեղեկանալով ՀՀ զինված ուժերի և Ադրբեջանի զինված ուժերի ներկայացուցիչների միջև վերը նշված տարածքներում ընդհարումների մասին, ինչի հետևանքներն անկանխատեսելի են և կարող են անդառնալի լինեն բոլոր կողմերի համար, լսելով ՀՀ կառավարության այսօրվա նիստում վարչապետի ժամանակավոր պաշտոնակատար Նիկոլ Փաշինյանի ելույթը, որ պատրաստվում է ստորագրել միջպետական փաստաթուղթ, որը վերաբերում է Հայաստանի և Ադրբեջանի միջև շփման գծի որևէ ձևով կանոնակարգմանը, հիմք ընդունելով ՀՀ Սահմանադրության 103-րդ հոդվածի 1-ին մասը, ԱԺ սահմանադրական օրենքի 98-րդ հոդվածի առաջին և երկրորդ մասերը ՀՀ ԱԺ-ն հայտարարում է՝ համաձայն Սահմանադրության 116-րդ հոդվածի առաջին մասի 1-ին և 2-րդ կետերի՝ ԱԺ-ն վավերացնում է այն միջազգային պայմանագրերը, որոնք վերաբերում են մարդու և քաղաքացու հիմնական իրավունքներին և ազատություններին, ինչպես նաև պարտականություններին, ունեն քաղաքական կամ ռազմական բնույթ։ Սահմանադրությանը հակասող միջազգային պայմանագրերը չեն կարող վավերացվել։

Սահմանադրության 205-րդ հոդվածի առաջին և երկրորդ մասերի համաձայն՝ ՀՀ տարածքի փոփոխությանը վերաբերող հարցերը լուծվում են հանրաքվեների միջոցով։ Հանրաքվե անցկացնելու որոշումը կառավարության առաջարկությամբ ընդունում է ԱԺ-ն։ Այսպիսով ՀՀ վարչապետի ժամանակավոր պաշտոնակատարը չի կարող իր ստորագրությամբ ուժի մեջ դնել մի փաստաթուղթ, որը կարող է ուժի մեջ մտնել բացառապես խորհրդարանի վավերացմամբ կամ հանրաքվեի արդյունքում։

Միաժամանակ հայ-ադրբեջանական շփման գծի սահմանազատման և սահմանագծման աշխատանքների հետ կապված ցանկացած գործողություն ներառում է ՀՀ յուրաքանչյուր քաղաքացու և հատկապես սահմանային բնակչության մարդու իրավունքների խնդիրները, որոնց հետ կապված ցանկացած միջազգային փաստաթուղթ պարտադիր է վավերացման։ Սահմանազատման հետ կապված ցանկացած փաստաթուղթ, որը հաշվի չի առնում մարդու իրավունքները, ուղղակիորեն կհակասի ՀՀ Սահմանադրությանը, մարդու իրավունքների միջազգային իրավունքին և իրական կյանքում կհանգեցնի ՀՀ պետական շահի, սահմանային բնակչության հիմնարար իրավունքների կոպիտ խախտումների շարունակությանը, ինչն այսօր նշված սահմանամերձ հատվածներում տեղի է ունենում»,-նշեց Էդմոն Մարուքյանը։

Աղբյուր` Փաստինֆո