Փաստ ինֆո

Վերջին տարիների, հատկապես 6 ամսվա պրակտիկան ցույց է տվել, որ այն ինչ շահեկան է Ադրբեջանին, այսօրվա կառավարությունը հանձինս վարչապետի ներկայացնում է, իբր , շահեկան է նաև Հայաստանի համար։ «Փաստինֆո»-ի հետ զրույցի ժամանակ այս մասին ասաց անվտանգության հարցերի փորձագետ Արմեն Մանվելյանը։

Վերջինս նկատեց՝ պարզ է, որ խոսք է գնում շատ վտանգավոր համաձայնագրի մասին, քանի որ փորձագետի կարծիքով գործող իշխանությունները չեն կարող Հայաստանի համար ինչ-որ շահեկան փաստաթղթի շուրջ աշխատեն։

«Հաշվի առնելով վերջին վեց ամիսների զարգացման տրամաբանությունը՝ կարելի է ասել, որ խոսքը գնում է GPS-ով Հայաստանից էլի տարածքների զիջման մասին, որի դիմաց ենթադրենք Ադրբեջանը խոսք է տալիս, որ իր տարածքով ինչ-որ կոմունիկացիա կաշխատի դեպի Ռուսաստան, ինչը շատ վտանգավոր է նաև Հայաստանի տնտեսության համար։ Դեռ հարց է՝ կոմերցիոն առումով դա մեզ ձեռք է տալիս, թե ոչ։ Այսինքն՝ օրինակ գործարարը կնախընտրի իր ապրանքը Ռուսաստան ուղարկի Լարսով՝ մեքենաներով բարձած, թե վագոններով Ադրբեջանի տարածքով։ Դա շատ կասկածելի և վտանգավոր գործընթաց է, որի հետևանքները հաշվի առնված չեն»,-նշեց փորձագետը՝ հավելելով, որ այս վտանգավոր գործընթացն արվում է գաղտնի և ոչ ոք որևէ բան չգիտի այդ մասին, իսկ եթե գործընթացը գաղտնի է՝ նշանակում է, որ դա հակահայկական փաստաթուղթ է։

Արմեն Մանվելյանի խոսքով Հայաստանի համար սա կլինի հերթական նահանջ։

«Այս համաձայնագրի արդյունքում զիջումների են գնալու նաև Տավուշի շրջանից, ընդհանրապես Վրաստան գնացող ճանապարհն անցնում է Ադրբեջանի վերահսկողության տակ։ Այսինքն` առաջանալով ու այդ գյուղերը վերցնելով՝ նրանք կարող են գնդակոծել հենց այդ ճանապարհը, ինչի արդյունքում կտրվում ենք նաև Վրաստանից։ Այսինքն` այն ճանապարհները, որոնք ունեինք մեր տարածքում, դառնում են վտանգավոր և որպես այլընտրանք փորձում են առաջարկել ադրբեջանական ճանապարհը»,-նշեց փորձագետը։
Արմեն Մանվելյանը վստահ է՝ եթե այդ փաստաթուղթը 100 տոկոսով շահեկան լիներ Հայաստանի համար, ապա դրա մասին կբարձրաձայնեին։ Պարզ է, որ այն Հայաստանին ձեռնտու չէ, դրա համար էլ խոսք է գնում գաղտնի, այլ ոչ թե աշխատանքային բանակցությունների մասին։

«Հիմա դրա դիմաց նրան փող են տվել, թե խոստումներ են տվել, արդեն էական չէ։ Էականն այն է, որ այս մարդը ոչ մի քաղաքական գործընթաց վերջին երեք տարում չի արել, որ շահեկան լինի ՀՀ-ին։ Սա հերթական կորուստը և մեր պարտությունն է լինելու։ Պարզ է, որ Ալիևն ուզում է օր առաջ այդ փաստաթուղթը ստորագրել, որովհետև վախենում է, որ ընտրություններից հետո Փաշինյանը չի մնա իր աթոռին։ Չեմ էլ բացառում, որ այդ փաստաթղթի ստորագրման դիմաց ինչ-որ բաներ է խոստացել, այդ թվում ֆինանսական օգնություն»,-նշեց Արմեն Մանվելյանը։

Ավելի վաղ ՀՀ վարչապետի պաշտոնակատար Նիկոլ Փաշինյանը կառավարության նիստի ժամանակ հաստատել էր երրորդ փաստաթղթի առկայությունը և ասել, որ մտադիր է այն ստորագրել. ««Այն լուծումները, որոնք այս պահին մեր միջազգային գործընկերների հետ ձեռք են բերված, այդ լուծումները 100 տոկոսով համապատասխանում են Հայաստանի շահերին, և այո՛, եթե Ադրբեջանն այդ պայմանավորվածություններն իրագործի և այն պայմաններում, ինչ-որ խոսել ենք, ես այդ թուղթը ստորագրելու եմ, որովհետև դա 100 տոկոսով համապատասխանում է Հայաստանի ազգային շահերին»,-ասել էր վարչապետը»։

Աղբյուր` Փաստինֆո