Փաստ ինֆո

ՀՀ նախկին փոխվարչապետ, «Հայաստան» դաշինքի նախընտրական շտաբի պետ Արմեն Գևորգյանը ՀՔԾ էր հրավիրվել դեռևս մեկ տարի առաջ հարուցված փողերի լվացման գործով։ ՀՀ ՀՔԾ-ից դուրս գալուց հետո Արմեն Գևորգյանը հայտարարել է, որ իրեն մեղադրանք է առաջադրվել դեռևս անցած տարի ապրիլի 16-ին ՀՔԾ-ում հարուցված քրեական գործի շրջանակներում։ 

«Այդ ժամանակ մեղադրանք չի առաջադրվել, որովհետև, կարծում եմ հասկացել են, որ դա աբսուրդի ժանրից է եղել»,-լրագրողների հետ զրույցում նշել է Գևորգյանը՝ հավելելով, որ իր գույքի վրա կալանք է դրվել, որը բողոքարկվել է դատական ատյաններում և բեկանվել։

«Մարդ պետք է էլեմենտար «քթի ծակ» ունենա այն առումով, որ հասկանա, թե երբ, քաղաքական ինչ պայմաններում և ինչ վիճակում՝ ինչ որոշում է կայացնում։ Դուք պատկերացնու՞մ եք՝ սահմաններում տիրող իրավիճակի պայմաններում, որոշել են ինձ մեղադրանք առաջադրել, որ գույքի վրա կալանք դնելու մասին որոշումը հիմնավորված լինի և ինչ-որ խափանման միջոց ընտրեն, որով խաթարեն իմ գործունեությունը՝ որպես «Հայաստան» դաշինքի շտաբի պետ»,- նշել է Գևորգյանը եւ հայտարարել, որ հրաժարվել է որևէ գործ ունենալ ՀՔԾ-ի հետ։

«Կյանքը ցույց է տվել, որ այդ կառույցը միայն քաղաքական պատվերներ է կատարում, ուստի՝ իրենց հետ նստելը և մեղադրանք քննարկելը ժամանակի կորուստ է»,- նշել է Արմեն Գեւորգյանը՝ ընդգծելով, որ մեղադրանքի որոշմանը չի ծանոթացել։
Նրա խոսքով՝ «Հայաստան» դաշինքի ներկայացուցիչները համատարած հրավիրվում են քննչական մարմիններ, ոստիկանություն՝ ինչ-որ անհասկանալի նյութերի նախապատրաստման շրջանակներում, ինչ-որ տարիներ շարունակ քննվող քրեական գործով ինչ-որ պարզաբանումներ ստանալու և այլն։

«Ակնհայտ է, որ մեր այսպես կոչված իշխանություններն ամեն ինչ անում են, որ մարդկանց մոտ ցանկությունը և վճռականությունը կոտրվի՝ իրենց դեմ պայքարելու, բայց կարծում եմ՝ նմանատիպ օինբազություններից վճռականությունը միայն ավելանում է, ամրապնդվում է։ Մեր դաշինքը կազմակերպված է արդեն, աշխատանքները դրված են ճիշտ հունի վրա»,- նշեց Գևորգյանը՝ հավելելով, որ ցավում է, որ այս իրավիճակում ՀՔԾ-ն զբաղվում է ինչ-որ անհասկանալի բաներով։

Աղբյուր` Փաստինֆո