Փաստ ինֆո

Պատերազմի ավարտից հետո Հադրութի շրջանի Հին Թաղեր և Խծաբերդ գյուղերում 62 հայ զինծառայողի գերության մեջ հայտնվելու և գյուղերի՝ ադրբեջանական վերահսկողության ներքո անցնելու փաստերի առթիվ հարուցված քրեական գործով մեղադրանք է առաջադրվել փոխգնդապետ Արսեն Ղազարյանին՝ ՀՀ քրեական օրենսգրքի 361-րդ հոդվածի 7-րդ մասով, 356-րդ հոդվածի 3-րդ մասով, 376-րդ հոդվածի 3-րդ մասով և 380-րդ հոդվածի 1-ին մասով՝ ռազմական դրության պայմաններում ծառայության վարն ինքնակամ լքելու, ռազմական դրության պայմաններում հրամանը չկատարելու, ռազմական դրության պայմաններում ծառայության նկատմամբ անփույթ վերաբերմունք ցուցաբերելու և մարտի ժամանակ մարտադաշտն ինքնակամ լքելու կամ զենքով գործելուց հրաժարվելու հատկանիշներով։

Վահան Հովհաննիսյանը «Փաստինֆո»-ի հետ զրույցում հայտնեց, որ Ղազարյանն առաջադրված մեղադրանքը չի ընդունում եւ մանրամասն ցուցմունք է տվել։ Փաստաբանի խոսքով՝ գտել են մի քավության նոխազ, որի վրա կուղղեն բոլոր գերեվարվածների հարազատների դժգոհության ալիքը։ Նրա խոսքով՝ բազմիցս ի պաշտպանություն փոխգնդապետի բողոքի ակցիաներ են կազմակերպել այն 38 անձինք ու նրանց հարազատները, ում փրկել է վերջինս։

Ըստ պաշտպանի՝ փոխգնդապետին առաջադրված մեղադրանքն անորոշ է և հակասական։

«Մեղադրում են երկու հակասական արարքի մեջ՝ որ չի կազմակերպել պաշտպանություն և 38 հոգու հետ միասին նահանջել է և որ չի կազմակերպել 62 հոգու նահանջը։

Իրականում ոչ մի տառ չեմ չափազանցնում, բազմիցս խնդրել ենք հայտնել հիմա նա ինչում է մեղադրվում նահանջելու, թե չնահանջելու մեջ, բայց պատասխանել չեն կարողանում»,- նշեց փաստաբանը՝ հավելելով, որ ամենասովորական մի փոխգնդապետի են մեղադրում այն բանում, որ գյուղերը հանձնվել են, 62 անձ գերի է ընկել, ուրիշ ոչ ոք, միայն մեկ գումարտակի հրամանատարի տեղակալ, փոխգնդապետ։

Փաստաբանի փոխանցմամբ՝ փոխգնդապետի դեմ ցուցմունք չկա, մեղադրանքի հիմքում դրել են, թե, իբր, առկա է եղել հրաման, որը նա չի կատարել, սակայն այդպիսի հրաման գոյություն չունի։

Վարույթն իրականացնող մարմինը միջնորդություն է ներկայացրել դատարան՝ փոխգնդապետի նկատմամբ կալանավորումը որպես խափանման միջոց ընտրելու մասին, որը մակագրվել է Երևանի ընդհանուր իրավասության դատարանի դատավոր Արտուշ Գաբրիելյանին։

Վարույթն իրականացնող մարմնի կողմից մատնանշված կալանավորման հիմքերը, ըստ փաստաբանի, շաբլոն են, ինչպես բոլոր կալանքի միջնորդություններում՝ կխուսափի, կփախչի և այլն։

«Առավել էական է կալանավորման ժամկետի վերաբերյալ նախաքննական մարմնի հիմնավորումները։ Ըստ միջնորդության՝ Ա․Ղազարյանը պետք է կալանքի տակ մնա մինչև Ադրբեջանից հայ գերիների վերադարձը, այլապես վերադառնալու դեպքում կազդի նրանց վրա։ Այսինքն, ըստ քննիչի, փոխգնդապետը կալանքի տակ պետք է մնա անորոշ ժամկետով, քանի որ այս պահին որևէ միջազգային կառույց չի կարող ասել, թե գերիները երբ կվերադառնան»,- նշեց Հովհաննիսյանը։

Ղազարյանի նկատմամբ կալանավորումը որպես խափանման միջոց ընտրելու մասին միջնորդության քննությունն արդեն ավարտվել է, դատարանը հեռացել է խորհրդակցական սենյակ՝ որոշում կայացնելու։ Փաստաբանը գտնում է, որ գործով կա ուղղորդվածություն, ինչը բավականին հետաքրքիր է, մասնավորապես, դռնփակ կալանքի նիստի մասին չգիտես որտեղից տեղեկանում են գերեվարվածների ծնողները և գալիս դատարան։ Ըստ փաստաբանի, հարազատներին քննիչներն են տեղեկացրել։

Հեղինակ՝ Իզաբել Սահակյան

Աղբյուր` Փաստինֆո