Փաստ ինֆո

Մոտ 40 քաղաքացի արդեն արձագանքել է Գառնիկ Իսագուլյանի, Հրանտ Բագրատյանի եւ Զարուհի Փոստանջյանի համատեղ հայտարարությանն ու կամավորագրվել՝ մեկնելու սահմանների պաշտպանության համար։ Այս մասին «Փաստինֆո»-ին տեղեկացրել է «Ազգային անվտանգություն» կուսակցության նախագահ Գառնիկ Իսագուլյանը ։

«Հրանտ Բագրատյանը սկսել է բանակցությունները, որպեսզի տեսնենք՝ հնարավո՞ր է արդյոք, որ մենք կարողանանք այդ մարդկանց զինել, ուղարկել սահման։ Ընդ որում կամավորագրվածների մեջ նաև ես եմ, որևէ խնդիր չկա։ Այսօր, եթե մեզ այդ թույլտվությունը տան, գոնե 40 հոգով կգնանք սահման, ես էլ իրենց կառաջնորդեմ։ Հարկավոր է սթափվել»,- նշել է գործիչը։

Հիշեցնենք, որ Գառնիկ Իսագուլյանը, Հրանտ Բագրատյանն ու Զարուհի Փոստանջյանը համատեղ հայտարարությամբ կոչ էին արել Ազատության հրապարակում հայտարարել աշխարհազորի հավաք։ ՀՀ Զինված ուժերին ու ոստիկանությանը պարտադրել զինել աշխարհազորը և օժանդակել դրանց տեղափոխումը՝ Վարդենիս ու Սյունիք։ Նաև հայտարարել էին, որ պետք է ձեռնարկվեն արմատական միջոցառումներ՝ ՀՀ տարածքային ամբողջականությունը վերականգնելու և պաշտպանելու ուղղությամբ, սակայն, դրանք չեն իրագործվել։

«Մենք փորձում էինք այդ հայտարարությունը 17-ի ֆորմատով ընդունել և հուսով էինք, որ դրան կլծվեին բոլոր այն դաշինքներն ու կուսակցությունները, որոնք ընտրապայքարի մեջ են մտել»,- նշել է Իսագուլյանը։

Նրա խոսքերով՝ հաճախ են իրենց մեղադրում անգործության մեջ, հիմա էլ առաջարկել են շատ գործնական քայլեր, քանի որ տեսնում են, որ մեր սահմաններում զորքը չի կանգնում, որովհետև քաղաքական ղեկավարության կողմից ուղղակի արգելվում է.

«Որոշեցինք աշխարհազոր կազմակերպել կամավորության սկզբունքով և մարդիկ կամավոր իրենք պատրաստ են գնալ սահմանները պաշտպանել, մենակ թե իշխանությունները տրամադրեն համապատասխան միջոցները ՝ խոսքս զենքի մասին է, կամ գոնե մարդկանց չկալանավորեն, ոնց որ կալանավորում են մյուս կամավորներին։ Սա է մեր հայտարարությունն ու գործողությունները»։

Իսագուլյանը նկատեց նաև, որ հանրությունը, կարծես թե, չի գիտակցում՝ ինչ է տեղի ունենում։ «Ազգային անվտանգություն» կուսակցության նախագահը ցավալի է համարում, որ հավաքի կոչ է արվում, իսկ նույն հանրությունը, որ մեղադրում է իրենց անգործության մեջ՝ քայլեր չի ձեռնարկում։

«Հիմա ո՞րն է ամենակարևորը՝ Սյունիքի հետ կապված խնդիրները, թե արտահերթ ընտրությունները։ Մենք նաև սրանով մեսիջներ ենք ուղարկում դաշինքներին, որոնք որպես ընդդիմություն պետք է մասնակցեն ընտրություններին։ Անչափ կարևոր է գիտակցումը։ Գուցե ժամանակն է, որ բոլոր եկեղեցիները զանգեր հնչեցնեն։ Մենք նույնիսկ չկարողացանք այս իրավիճակում մեկտեղել մեր նախկին ղեկավարներին։ Սա էլ է շատ վատ երևույթ։ Ի՞նչն է ավելի առաջնային։ Այո, Նիկոլի դավադիր իշխանությունը պետք է հեռացնել, ինքը փողոցով է եկել, փողոցով էլ պետք է հեռացնել։ Դա մեր հիմնական թեզն էր»։

Իսագուլյանը տեղեկացրեց, որ նամակ են հղելու Վեհափառ հայրապետին, որ բոլոր եկեղեցիների զանգերը հնչեցվեն։ Կասկածում է նաև, որ մարդը, ով հայրենիք է ծախել, կարող է ընտրություններով իշխանություն տալ։ Ուստի փողոցը պետք է ակտիվ մնա։

Աղբյուր` Փաստինֆո