Փաստ ինֆո

Ադրբեջանական կողմը, հստակ հասկանալով, որ նոյեմբերի 10-ից Հայաստանում ստեղծվել է ներքաղաքական ճգնաժամ, իսկ իշխանության ղեկին էլ դավաճանական ռեժիմի ներկայացուցիչներ են, առիթից օգտվելով ապօրինի զբաղեցնում են ռազմավարական դիրքերը։ «Փաստինֆո»-ի հետ զրույցում այս մասին ասաց միջազգայնագետ, «Օրբելի» կենտրոնի փորձագետ Անդրանիկ Հովհաննիսյանը՝ անդրադառնալով ադրբեջանցիների կողմից ՀՀ պետական սահմանը հատելուն և արդեն մի քանի օր շարունակ ՀՀ սահմանում մնալուն։

Նրա խոսքով ՀՀ զինված ուժերը երկու-երեք շաբաթվա ընթացքում կարող էին զբաղեցնել ու ամրապնդել ռազմավարական կարևոր նշանակության բարձունքները, սակայն դրա համար քաղաքական իշխանությունների հրամանն էր պետք, ինչը պատերազմից վեց ամիս անց այդպես էլ չստացան։

«Պատճառն այն է, որ Նիկոլ Փաշինյանի գլխավորած ռեժիմի ներկայացուցիչները 2020-ի նոյեմբերի 10-ից հետո զբաղված են եղել իշխանությունն ամեն գնով պահպանելու, այլ ոչ թե ՀՀ սահմաններն ամրապնդելու հարցով»,-նշեց Անդրանիկ Հովհաննիսյանը։

Փորձագետը նշեց, որ Արցախի Հանրապետության նկատմամբ թուրք-ադրբեջանական տանդեմի սանձազերծած ահաբեկչական ագրեսիայից հետո ինքը և մի շարք այլ քաղաքական գործիչներ բազմիցս զգուշացրել են, որ Նիկոլ Փաշինյանն Իլհամ Ալիևի հետ բանավոր պայմանավորվածություններ է ձեռք բերել, ինչի արդյունքում պատրաստվում է թշնամուն հանձնել Տավուշի, Գեղարքունիքի և Սյունիքի մարզերի որոշ ռազմավարական դիրքեր։

«Մարդիկ չէին հավատում, փաստեր էին պահանջում, իսկ հիմա իրենց սեփական աչքերով են տեսնում, թե ինչ է կատարվում սահմանամերձ տարածքներում։ Նույնը շուտով տեղի է ունենալու Արարատի և Վայոց Ձորի մարզերում, եթե ազգադավները՝ Փաշինյանի գլխավորությամբ, մնան իշխանության ղեկին։ Քանի դեռ Նիկոլ Փաշինյանը հանդիսանում է ՀՀ վարչապետ, մեր հայրենիքն ինչպես մարդկային, այնպես էլ տարածքային նոր կորուստներ է ունենալու»,-նշեց Անդրանիկ Հովհաննիսյանը։

Փորձագետը գտնում է, որ այս պահին անհրաժեշտ է ադրբեջանցի դիվերսանտներին շրջապատել, զինաթափել և ձերբակալել, որպեսզի հետագայում հնարավորություն ունենանք փոխանակել Բաքվում գտնվող հայ ռազմագերիների հետ. «Մինչև թշնամին հուժկու հարված չստանա, որքան հնարավոր է տարբեր ուղղություններով առաջ է գալու»,-ասաց փորձագետը։

Դիտարկմանը, որ արդեն 7 օր է, ինչ թշնամին ՀՀ տարածքում է և հայկական կողմը որևէ քայլ չի ձեռնարկել, հնարավո՞ր է այժմ նման միջոցի դիմի, Անդրանիկ Հովհաննիսյանն ասաց. «Այդ հատուկ գործողությունը պետք է տեղի ունենար հենց առաջին օրը, երբ թշնամին խախտեց Հայաստանի պետական սահմանը։ Իշխանությունների անգործությունը պետական դավաճանություն է, և սա ՀՀ Սահմանադրության ու սահմանապահ զորքերի մասին օրենքի խախտում է։ Այս ամենը կարող է մեր պետության համար ճակատագրական դառնալ։ Ադրբեջանցի դիվերսանտներն ամրապնդվում են գրավյալ տարածքներում և օրեկան մի քանի հարյուր մետր առաջ մղվում։ Երկու տարբերակ ունենք կա՛մ պետք է հեռացնենք իշխանությունից դավաճանական ռեժիմին, կա՛ հուժկու հարված հասցնենք թշնամուն, հակառակ դեպքում ստիպված կլինենք դիմանալ նվաստացմանը և մոտակա տարիներին աղուհացով դիմավորել ադրբեջանցիներին Երևանում և այլ քաղաքներում»,-նշեց Անդրանիկ Հովհաննիսյանը։

Աղբյուր` Փաստինֆո