Փաստ ինֆո

Ես ողջունում եմ ՀԱԿ-ի որոշումը՝ մասնակցել արտահերթ խորհրդարանական ընտրություններին: Անկախ իմ վերաբերմունքից Լևոն Տեր-Պետրոսյանի հանդեպ, ես գտնում եմ, որ այնտեղ կան բազմաթիվ քաղաքական գործիչներ, որոնք իրենց պահվածքով և գիտելիքներով կարող են օգտակար լինել մեր հայրենիքի զարգացմանը: Ես հաջողություն եմ ցանկանում իրենց, իհարկե, ոչ այնքան, որ մեզ հաղթեն: Այս մասին այսօր լրագրողների հետ զրույցում ասել է «Իմ քայլը» խմբակցության պատգամավոր Հովիկ Աղազարյանը.

«Խորհրդարանում այդպիսի մարդիկ պետք է լինեն, որոնք քաղաքական ու գաղափարական հենքով են շաղախված իրար հետ, ոչ թե ուրիշ հենքով: Բնականաբար, այդպիսի մարդկանց հետ և բանավիճելն է հեշտ, և այս կամ այն հարցի շուրջ բուռն, խիստ քննարկումների արդյունքում կարող ենք գալ ինչ-որ եզրահանգման։  Բայց այն մարդիկ, որոնք միավորվել են լրիվ ուրիշ շաղախով, իրենց հետ դժվար է: Եթե դու ֆուտբոլ ես խաղում, իսկ դիմացինդ ռեգբի, դու չես կարող խաղալ ու հաղթել, պետք է բոլորը ֆուտբոլ խաղան, որ կարողանաս այդ օրենքներով շարժվես»,-ասաց Աղազարյանը:

Արձագանքելով Լևոն Տեր-Պետրոսյանի հայտարարությանը, որ չպետք է թույլ տալ՝ ոչ Նիկոլ Փաշինյանի վերարտադրությունը, ոչ Ռոբերտ Քոչարյանի վերադարձը, Հովիկ Աղազարյանն ասաց.

«Եթե հիշում եք, 2013 թվականի նախագահական ընտրություններից առաջ Լևոն Տեր-Պետրոսյանը հայտարարեց, որ դառնում է 68 տարեկան և նպատակահարմար չի գտնում մասնակցել նախագահական ընտրություններին: Հարց է առաջանում՝ դրանից 2 տարի առաջ ինքը չգիտե՞ր, որ 68 տարեկան է դառնալու, չկարողացա՞վ իր շրջապատում մեկնումեկին նախապատրաստել, որ մասնակցի նախագահական ընտրություններին:

Հիմա, երբ անցնելով կորոնավիրուս, պատերազմի ծանր իրողություններ, դրանից հետո եթե Նիկոլ Փաշինյանն իր թիմով արձանագրի հաջողություն արտահերթ ընտրություններում, ինչում ես համոզված եմ, ապա Լևոն Տեր-Պետրոսյանը այդ հոգեբանական հարվածին չի դիմանա, կարող է նաև ինֆարկտ ստանա»,-ասաց Աղազարյանը:

Աղբյուր` Փաստինֆո