Փաստ ինֆո

Իշխանությունը տարածքային որևէ զիջումների չպետք է գնա, եթե մեկ անգամ զիջենք, էլի ենք զիջելու: Եթե այս պահին համառություն, ատամ ցույց չտանք, մենք կկորցնենք Հայաստանը: «Փաստինֆո»-ի հետ զրույցում ասաց պատգամավոր Սոֆյա Հովսեփյանը՝ անդրադառնալով հայ-ադրբեջանական սահմանին տիրող իրավիճակին:

Պատգամավորի համար անհասկանալի էր, ինչո՞ւ են թույլ տվել, որ հակառակորդը մտնի Հայաստանի տարածք, որ հիմա էլ խնդրում են, որպեսզի հետ գնա.

«Չպետք է անգամ թողնեին, որ ադրբեջանցի զինվորները Հայաստանի սահմանին մոտենային, ուր մնաց սահման ներխուժեն: Փորձեք մեկդ Ադրբեջանի սահմանն անցնել, տեսեք՝ ինչ կանեն: Ամեն ինչ ամլացել է, բանակին դարձրել են չգործող կառույց, զինվորը չգիտի կրակի կդատվի, թե՞ չկրակի կդատվի, անհասկանալի իրավիճակ է»:

Դիտարկմանը, որ երբ ԱԺ նիստերի ժամանակ պատգամավորները բարձրաձայնում էին սահմանի հետ կապված խնդիրները, վարչապետի պաշտոնակատարն ասում էր, որ աշխատանքներ իրականացվում են, մինչդեռ վերջին զարգացումները ցույց տվեցին, որ խնդիրներ կան առաջնագծի կահավորման հետ կապված, պատգամավորը նկատեց՝ իրենց կողմից խնդիրը բարձրաձայնելուց մեկ շաբաթ էլ չանցավ, երբ հակառակորդն առաջացավ։

«Այն պարագայում, երբ իշխանությունը շարունակում է թերագնահատել իր թշնամուն, երբ շարունակում է անտեսել, թե ինչպիսի պետության հետ գործ ունի, այս խնդիրն ենք ունենալու։ 44-օրյա պատերազմի ժամանակ թշնամին օգտագործեց հնարավոր բոլոր նորարարական տեխնոլոգիաները և արդյոք նրանք այսօր կարիք ունեն, որ մեր պատգամավորներն ասեն՝ սահմանն ինչպիսի վիճակում է։ Սա նշանակում է, որ մեր կառավարությունը ոչ թե 80-ականների, այլ շատ հին ժամանակների տեխնոլոգիաներով է ռազմագիտությունը պատկերացնում, ինչը շատ լուրջ խնդիր է»,-ասաց Սոֆյա Հովսեփյանը։

Ինչպես արդեն տեղեկացրել ենք՝ մայիսի 12-ի առավոտյան հակառակորդը առանց կրակոցի միանգամից 3-4 կմ գրավել է՝ առաջանալով Սյունիքի մարզի Իշխանասարի ուղղությամբ եւ դիրքավորվել Սեւ լճի մոտակայքում, մայիսի 13-ին արդեն հայտնի դարձավ, որ նրանք առաջացել են նաեւ Վարդենիսի եւ Սիսիանի ուղղությամբ։ Նիկոլ Փաշինյանի կողմից հրապարակված տվյալների համաձայն՝ 250 ադրբեջանցի զինվոր գտնվում է մեր երկրի տարածքում։ Վերջիններս ոչ միայն չեն ոչնչացվել որպես դիվերսանտներ, այլ անգամ չեն հռչակվել որպես դիվերսանտներ ու կալանավորելու ուղղությամբ քայլեր չեն արվել։

Աղբյուր` Փաստինֆո