Փաստ ինֆո

Ամենամեծ խնդիրը այն էր, որ սահմանի մի հատվածը եղել է չպաշտպանված և հնարավորություն է ստեղծվել ադրբեջանցիների համար՝  անարգել մտնել և որոշ առումով դիրքավորվել: Այս մասին մամուլի ասուլիսի ժամանակ ասաց «Հենակետ» վերլուծական կենտրոնի ղեկավար, Արցախի նախագահի նախկին խորհրդական Տիգրան Աբրահամյանը:

Նրա խոսքով, իշխանությունների անգործության հետևանքով է, որ ստեղծվել է ճգնաժամային իրավիճակ  և Հայաստանը ստիպված է եղել դիմել Ռուսաստանին, ՀԱՊԿ-ին և եվրոպական մի շարք երկրների։

Ըստ Աբրահամյանի, Արցախում տեղի ունեցող գործընթացները սերտորեն կապված են Սյունիքում և Գեղարքունիքում հակառակորդի ագրեսիայի հետ, իսկ Բաքուն օգտվելով Հայաստանի իշխանությունների թուլությունից, փորձում է իր համար հասնել առավելագույն արդյունքի:

«Իշխանությունների անգործության արդյունքում Հայաստանը ստիպված եղավ դիմել արտաքին ուժերին: Այն գործընթացները, որոնք այսօր անհանգստացնում են հասարակության առողջ հատվածին, վաղուց են նկատելի Սյունիքի բնակիչների համար:  Ես կարծում եմ, որ իշխանությունների կողմից փաստացի հանցագործության մասին հաղորդում է եղել, քանի որ պատերազմից հետո 6 ամիս անցել է և սահմանի մի մեծ հատված եղել է անպաշտպան։ Մենք նոյեմբերի 9-ի հայտարարությունից հետո կորցրինք Արցախի 75 տոկոսը, 5000-ին մոտ մեր հայրենակիցներ զոհվեցին, և այսօր էլ Հայաստանը դասեր չի քաղել, և մոտենում է ողբերգական հաջորդ կետին»,-ընդգծեց փորձագետը։ 

Աբրահամյանի կարծիքով, Հայաստանը ոչ միայն դասեր չի քաղել Ղարաբաղյան պատերազմից, այլեւ ավելի է խորացրել ճգնաժամը:

«Ժողովրդի գիտակցության մեջ պետք է ամրանար այն միտքը, որ Արցախը պաշտպանող զինվորը պաշտպանում է նաև Երևանը: Հասարակության մի մասը չի հասկանում իրավիճակի ողբերգությունը և որոշ դեպքերում դրա կարևորությունը։ Միևնույն ժամանակ, հասարակության մեջ ջրբաժաններ են ստեղծվել, և այլ մարզերի որոշ բնակիչներ կարծում են, որ Սյունիքի խնդիրը նրանց չի վերաբերում»,-նկատեց վերլուծական կենտրոնի ղեկավարը:

Աղբյուր` Փաստինֆո