Փաստ ինֆո

Մարդիկ ընտրել են պարտվողական քաղաքականություն՝ ինչ-ինչ հեռահար նպատակներով։ Թե որն է նպատակը, դժվար է ասել, բայց այն, որ ամբողջովին ցանկանում են ստորացնել հայ տղամարդուն, հայկական պետականությունը՝ փաստ է։ Այս մասին «Փաստինֆո»-ի հետ զրույցում ասաց «Արաբո» ջոկատի հրամանատար Մանվել Եղիազարյանը՝ անդրադառնալով Սյունիքում տիրող իրավիճակին։

Ինչպես արդեն տեղեկացրել ենք՝ մայիսի 12-ի առավոտյան հակառակորդը առանց կրակոցի միանգամից 3-4 կմ գրավել է՝ առաջանալով Սյունիքի մարզի Իշխանասարի ուղղությամբ եւ դիրքավորվել Սեւ լճի մոտակայքում, մայիսի 13-ին արդեն հայտնի դարձավ, որ նրանք առաջացել են նաեւ Վարդենիսի եւ Սիսիանի ուղղությամբ։ Նիկոլ Փաշինյանի կողմից հրապարակված տվյալների համաձայն՝ 250 ադրբեջանցի զինվոր գտնվում է մեր երկրի տարածքում։ Վերջիններս ոչ միայն չեն ոչնչացվել որպես դիվերսանտներ, այլ անգամ չեն հռչակվել որպես դիվերսանտներ ու կալանավորելու ուղղությամբ քայլեր չեն արվել։

Մանվել Եղիազարյանը «Փաստինֆո»-ի հետ զրույցում նշեց, որ մենք այնպիսի իրավիճակում չենք, որ թուրքերն այդքան լկտիանան։
«Մենք ցանկանում ենք, որ նրանք լկտիանան, իրենք էլ՝ լկտիանում են։ Նիկոլ Փաշինյանը ոչինչ չի անում՝ մեր ազգային ոգին բարձրացնելու, բանակը համալրելու, քաղաքացուն ուշքի բերելու համար, քաղաքացուն ասելու, որ մենք մարտադաշտում չենք պարտվել, այս ամբողջը մարտադաշտի շարունակությունն է»,- նշեց Եղիազարյանը։

Ինչ վերաբերում է Սև լճի ռազմավարական նշանակությանը, Եղիազարյանը նշեց, որ խելոք մարդիկ գիտեն, ապուշները՝ չգիտեն, խելոք մարդիկ շատ լավ գիտեն, որ շուտով պատերազմներն աշխարհում լինելու են խմելու ջրի համար։

«Բացի դա՝ դա Հայաստանինն է։ Սև լիճը ինչպե՞ս կարելի է տալ հակառակորդին։ Մի անմեղսունակ էլ գրում է, որ փառք Աստծո, թուրքերը երկու կմ են առաջ եկել, էժան պրծանք, վաղն էլ Երևանի կեսը կգրավեն, կասեն՝ էժան պրծանք»,- նշեց Եղիազարյանը՝ հավելելով, որ դա նշանակում է, որ մեր իշխանությունները վարում են «Վերգո»-ական քաղաքականություն։

«Այստեղ միայն Սյունիքի դիրքերի մասին չէ խոսքը։ Ամբողջ Հայաստան երկրում որտեղ էլ մի թիզ հող ենք տալիս, ուրեմն տանուլ ենք տալիս։

Ո՞ւմ ենք տանուլ տալիս։ Առաջ ասում էինք՝ վաայ, Թուրքիան ուժեղ երկիր է, թուրքերը շատ են, տանուլ տվեցինք»,- նշեց Եղիազարյանը՝ հավելելով, որ այժմ վախենում ենք մեզ պաշտպանելուց, ոչ թե վախենում ենք, այլ՝ այդպես է ներկայացվում մեզ պաշտպանելը։

«Ո՞վ է մեղավոր, հայ տղամա՞րդն է մեղավոր։ Հայ տղամարդը մեղավոր չէ, մենք պարտավոր ենք հայ տղամարդու պատկեր ներկայացնել աշխարհին, ասել՝ գիտեք ինչ կա, եթե մենք Հայաստան երկիրը տանուլ տանք, կործանվի, որևէ մեկը մեզ համար չի ցավալու, բայց երբ մենք հաղթեցինք պատերազմը՝ մեզղ անգամ կգովերգեն։ Դա է աշխարհի իրականությունը։ Ուժեղներին չեն դատում»,- նշեց Եղիազարյանը։

Աղբյուր` Փաստինֆո