Փաստ ինֆո

Իրատեսական է, որ Ադրբեջանը շարունակելու է ներկայացնել տարատեսակ պահանջներ և ստեղծել իրավիճակներ, որոնք բարդ կացության մեջ կդնեն Հայաստանին։ «Փաստինֆո»-ի հետ զրույցի ժամանակ ասաց ԵՊՀ արևելագիտության ֆակուլտետի դեկան, թուրքագետ Ռուբեն Մելքոնյանը։

Նրա խոսքով՝ որևէ մեկի համար նորություն չէ, որ Ադրբեջանը պահանջների ամբողջություն ունի և դեռ կարող է ավելացնել այն։ Ավելին, Ադրբեջանը շարունակելու է ստեղծել փակուղային իրավիճակներ, որոնք թուրքագետի կարծիքով կարող են ամփոփվել Հայաստանի կողմից ինչպես Նիկոլ Փաշինյանն էր ասում «ցավալի զիջումներով»։

Ռուբեն Մելքոնյանը չի բացառում, որ այս փուլում Ադրբեջանը բարձրացնի անկլավների հարցը. «Ադրբեջանը պատրաստված շարունակում է իր քաղաքականությունը, և պատերազմը շարունակվում է նաև բանակցություններում, իսկ Հայաստանն այս բանակցություններում, ցավոք սրտի, շարունակում է ներկայացնել այն իշխանությունը, որը պարտվել է։ Երբ թշնամական զորքը կրակոցով թե առանց կրակոցի գտնվում է քո երկրի տարածքում, դա ապացուցում է մի բան, որ իշխանությունը չի կարողանում իրականացնել իր ամենակարևոր առաքելությունը՝ տարածքների, սահմանների անձեռնմխելիությունը։ Թուրքական և ադրբեջանական մտածելակերպն այնպիսին է, որ հատկապես թուլացած Հայաստանից փորձելու են ստանալ ամեն հնարավոր և անհնար զիջում՝ բերելով տարբեր պատրվակներ»,-նշեց Ռուբեն Մելքոնյանը։

Հարցին՝ արդյոք Հայաստանն էլ իր հերթին չի՞ կարող հողային պահանջներ ներկայացնել, թուրքագետը նկատեց կապիտուլյացիայի ենթարկված կողմը պահանջներ ներկայացնելու ո՛չ իրավունք, ո՛չ էլ հնարավորություն չի ունենում։

Դիտարկմանը՝ արդյոք նման հնարավորություն կա, սակայն գործող իշխանություններն այն չեն օգտագործում, թուրքագետն ասաց. «Բազմաթիվ հնարավորություններ կան, բայց պետք է հասկանանք, որ Հայաստանի և Ադրբեջանի միջև սահմանազատում երբևէ չի եղել։ Սովետական Միության ժամանակ այդ երկրները գոյություն են ունեցել մեկ ընդհանուր պետության մեջ և հիմա հապշտապ ու գոյություն չունեցող Սովետական միության ինչ-որ քարտեզների հիման վրա սահմանազատում անելը տրամաբանության մեջ չի տեղավորվում»,-ասաց Ռուբեն Մելքոնյանը։

Հարցին՝ եթե այս իշխանությունները չլինեն, այլ իշխանությունների ղեկավարման պարագայում Հայաստանը կարո՞ղ է նման պահանջ ներկայացնել, Ռուբեն Մելքոնյանը նկատեց՝ այս իշխանությունների համեմատ ցանկացած իշխանություն շատ ավելի շահեկան, հուսադրող քայլեր և հակաքայլեր կարող էր անել։

Աղբյուր` Փաստինֆո