Փաստ ինֆո

«Թարգեք էս ամեն ինչը, վերացրեք քրեական հետապնդումները, ամոթ է». Արթուր Այվազյանը՝ Մանախը, զինակից ընկերների հետ ՀՀ գլխավոր դատախազության շենքի դիմաց բողոքի ակցիա էր կազմակերպել՝ պահանջելով դադարեցնել իրենց նկատմամբ քրեական հետապնդումը, որովհետև ազատամարտիկները չեն խոչընդոտել պետական սահմանների պաշտպանությանը, փոխարենը զենք են խնդրել՝ մասնակցելու Սյունիքի պաշտպանությանը։ 

Մանախը պահանջում է իրականացնել ՀՀ պետական սահմանների խիստ պահպանության և ազգաբնակչության անվտանգության հետ խնդիրների հրատապ քննարկում։ Դիմելով իրավապահներին Մանախը հարցրեց՝ ինչո՞ւ են իրենց քրեական հետապնդման ենթարկում, երբ ադրբեջանցիներն են հատել Սյունիքի սահմանները։

«Դուք խաբում եք մարդկանց, հանրությունը պետք է իմանա իրական վտանգի առկայության մասին՝ ինչը ես ապացուցել եմ, ամբողջը ներկայացված է համապատասխան պետական մարմիններին։ Արածներս ի՞նչ է։ Կապիտուլյանտը ամբողջ հանրապետությունը փակելով եկավ իշխանության, 20 րոպե ճանապարհը փակել ենք, մենք ե՞նք խուլիգանություն կատարել։ Զենք ենք պահանջում, պահանջում ենք զինել գյուղերը, մենք պետք է ինքնապաշտպանություն կատարենք, ուժեղացնենք անվտանգությունը։ Եթե դա ձեր ստրատեգիական նպատակների մեջ չի մտնում, ապա դա իմ կյանքի նպատակն է»։

Դիմելով ՀՀ գլխավոր դատախազին Մանախը նշեց՝ քրեական հետապնդման իրական պատճառները պետք է բացահայտվեն։

«Պահանջում եմ այս գործը վերցնել անձնական հսկողության տակ։ Մեր նկատմամբ սադրանքներ հրահրած, ապօրինի քրեական հետապնդում իրականացնող, պետական պատասխանատու պաշտոնատար անձանց ենթարկել պատասխանատվության։ Անհապաղ կարճել այս աբսուրդ, քաղաքական ենթատեքստով քրեական գործը»։

Բողոքի ակցիայի մասնակիցներին մոտեցել է դատախազության ներկայացուցիչը։ Մանախը վերջինիս ներկայացրել է, որ ՀՀ պետական սահմանը հատել են 250 զինված անձ, որևէ մեկը չի ձերբակալվել և հարցաքննվել, բայց ՀՀ քաղաքացու նկատմամբ, որը իր խմբով մեկնել է Սյունիք՝ զենք ստանալու և հայրենիքը պաշտպանելու, քրեական գործ է հարուցվել։ Վերջինս հայտնեց նաև, որ իրենց ունեցած տեղեկություններով՝ սադրիչները մարզպետի ազգականներն ու ընկերներն են, ավելին՝ գործը քննվում է Սյունիքի մարզի ՔԿ-ում, որի նկատմամբ հսկողություն իրականացնող դատախազությունում է աշխատում մարզպետի որդին։

«Այս ամեն ինչի մեջ ներքաշված են սյունիքի մարզպետի բարեկամները։ Ոնց կարող է գործը քննվի Սյունիքում։ Պահանջում եմ գործը բերել Երևան, եթե պետք է գլխավոր դատախազը հրավիրի իմ փաստաբաններին։ Ինչ հիմքեր են դրել մեզ մեղադրանք առաջադրելու մեջ՝ սա աբսուրդ է»։ Դատախազությունից խոստացել են գործը հսկողության տակ պահել։

Հիշեցնենք, որ ազատամարտիկները Սյունիքում բողոքի ակցիա էին իրականացրել՝ փակելով Հայաստան-Արցախ ճանապարհը։ Նրանք պահանջում էին իրենց վերադարձնել զենքերը՝ Սյունիքի սահմանը պաշտպանելու համար, բացի այդ՝ զինել սյունեցիներին։ Ակցիաների ընթացքում 8 անձ բերման է ենթարկվել ոստիկանություն, իսկ Արթուր Այվազյանը՝ ձերբակալվել՝ խուլիգանության կասկածանքով։

Աղբյուր` Փաստինֆո