Փաստ ինֆո

Այսօր չափազանց կարևոր և պատասխանատու օր է բոլորիս համար, հայրենիքի շենացմանն ու հզորացմանն ուղղված նույնանման տեսլականով պայմանավորված, «Հայրենիք» և «Հանրապետական» կուսակցությունների քաղաքական թիմերը երկար քննարկումների արդյունքում որոշել են մեկտեղել ուժերը, դաշինք կազմել և միասին մասնակցել ընտրություններին: Այս մասին «Պատիվ ունեմ» դաշինքի հուշագրի կնքման արարողության ժամանակ ասաց «Հայրենիք» կուսակցության ղեկավար Արթուր Վանեցյանը:

«Անցած օրերի ընթացքում մենք շատ ենք խոսել այն մասին, թե ինչու՞ հենց Հայրենիք-ՀՀԿ դաշինք և մեր երկիրն այս մղձավանջից դուրս բերելու ի՞նչ ուղիներ ենք տեսնում: Առաջիկայում այս մասին շատ ենք խոսելու, փորձելու ենք անել ամեն ինչ, որպեսզի ՀՀ ամեն քաղաքացի հստակ իմանա, թե ի՞նչ ծրագրեր ենք իրականացնելու իշխանությունը ստանձնելուց հետո: Որպեսզի մեր ծրագիրն ամփոփ և ամբողջական լինի, կարևորում ենք մեր հայրենակիցներին հուզող բոլոր խնդիրների հավաքագրումն ու ցուցակագրումը: Այս գործընթացը մեզ հնարավորություն կտա մեր ծրագրերում ներառել բոլոր խնդիրները և ներկայացնել դրանց լուծման ուղիները»,-ասաց Վանեցյանը:

«Հայրենիք» կուսակցության նախագահն ընդգծեց, որ նախընտրական շրջանը միայն խոստումներ տալու, մրցակիցների նկատմամաբ սեփական առավելությունը ցույց տալու համար չէ.

«Այսօր մեր հայրենակիցների զգալի հատվածը սգակիր է, դրանում մեղավոր ենք բոլորս: Բոլորիս սխալների ու բացթողումների հետևանքով Հայաստանում իշխանության է եկել մի ուժ, որը կործանել է ամեն ինչ, մենք պետք է լավ հասկանանք, որ կանգնած ենք պետականություն կորցնելու և նույնիսկ բնաջնջվելու իրական սպառնալիքի առաջ, դրա վառ ապացույցը օրերս թշնամու զորքերի անարգել ներթափանցումն է Սյունիքի ու Գեղարքունիքի մարզերի տարածքներ, այդ սպառնալիքը հաղթահարելու մեկ հնարավորություն կա՝ մեկտեղել մեր ժողովրդի բոլոր կարողությունները, իրականացնել նվիրական և հետևողական աշխատանք»,-ասաց Արթուր Վանեցյանը:

Աղբյուր` Փաստինֆո