Փաստ ինֆո

ԲԴԽ նախագահ (լիազորությունները կասեցված են) Ռուբեն Վարդազարյանի դեմ քրեական գործ է հարուցվել ոչ թե ենթադրյալ խախտումներ բացահայտելու, այլ՝ Ռուբեն Վարդազարյանին ԲԴԽ-ից հեռացնելու համար, քանի որ դատավորներին կարգապահական պատասխանատվության ենթարկելու մասին միջնորդությունները ԲԴԽ-ն չի բավարարում, նախաքննական մարմինների կողմից կալանավորման միջնորդություններ են ներկայացվում դատարան, որոնք ևս չեն բավարարվում։ Այս մասին Երևանի ընդհանուր իրավասության դատանում ընթացող դատական նիստի ընթացքում ասաց փաստաբան Արամ Օրբելյանը։

Նա նշել է, որ Վարդազարյանին ԲԴԽ-ից հեռացրել են՝ դատական իշխանությունը թուլացնելու նպատակով եւ ընդգծել, որ Վարդազարյանին առաջադրված մեղադրանքը վերաբերում է պաշտոնեական դիրքին, հետևաբար՝ պետք է հաղթահարվեր նրա անձեռնմխելիությունը՝ դիմելով ԲԴԽ։

Նշենք, որ դատախազ Աշոտ Ժամկոչյանը դատարանին ներկայացրեց՝ Ռուբեն Վարդազարյանի կողմից նախկինում կայացված որոշումը, որով վերջինս դիրքորոշում էր հայտնել առ այն, որ դատավորի նկատմամբ կարող է քրեական գործ հարուցվել՝ առանց անձեռնմխելիության հաղթահարման։ Դատախազը խնդրեց դատարանին՝ նշված որոշումը քննության առարկա դարձնել, քանի որ դա Վարդազարյանի՝ նախկինում արտահայտած դիրքորոշումն էր, որին այժմ հակասում է հենց ինքը։

ՀՔԾ քննիչ Կոստանդյանն էլ միացավ դատախազի կողմից ներկայացրած դիրքորոշմանը՝ հավելելով, որ քրեական գործ հարուցելուց և մեղադրանք առաջադրելուց առաջ ԲԴԽ համաձայնությունը ստանալ պետք չէր։

Ավելին՝ դատախազ Աշոտ Ժամկոչյանը գտնում է, որ Ռուբեն Վարդազարյանի նկատմամբ 2005թ Սահմանադրությամբ նախատեսված անձեռնմխելիության երաշխիքները կիրառելի չեն, ինչի դեմ առարկեց պաշտպանության կողմը։ Արամ Օրբելյանն էլ նկատեց, որ խոսք գնում է ընթացակարգային անձեռնմխելիության մասին։ Ըստ փաստաբանի՝ Սահմանադրությամբ նախատեսված երաշխիքները նախ և առաջ բխում են դատավորների անփոխարինելիության և անկախության սկզբունքից։

Ինչպես արդեն տեղեկացրել ենք՝ ՀՀ ԲԴԽ նախագահ Ռուբեն Վարդազարյանին ՀՔԾ-ում մեղադրանք է առաջադրվել՝ ՀՀ քրեական օրենսգրքի 332-րդ հոդվածի 3-րդ մասի՝ պաշտոնեական դիրքն օգտագործելով արդարադատության իրականացմանը խոչընդոտելու հատկանիշներով, նրա նկատմամբ որպես խափանման միջոց է կիրառվել ստորագրությունը՝ չհեռանալու մասին։ Վարդազարյանի դեմ քրեական գործ է հարուցվել՝ առանց նրա անձեռնմխելիության հաղթահարման՝ նախկին դատավոր, ԱԱԾ տնօրենի նորանշանակ տեղակալ Անդրանիկ Սիմոնյանի հաղորդման հիման վրա։

Նկատենք, որ թեև ՀՀ գլխավոր դատախազությունը հայտարարել էր, թե Ռուբեն Վարդազարյանի գործառութային անձեռնմխելիության հաղթահարման խնդիր չկար, քանի որ քրեական հետապնդումը չի վերաբերում դատավորի կողմից իր լիազորությունների իրականացմանը։ Անգամ նախկին զինդատախազ Գագիկ Ջհանգիրյանի հանձնարարությամբ պատրաստված ԲԴԽ հաղորդագրության մեջ նշվել էր, թե Ռուբեն Վարդազարյանի նկատմամբ քրեական հետապնդումն իրականացվում է ոչ իր լիազորությունների իրականացման կապակցությամբ, սակայն փաստն այն է, որ քրեական գործը հարուցվել է պաշտոնեական դիրքի օգտագործմամբ արդարադատության իրականացմանը խոչընդոտելու հատկանիշներով։

Հեղինակ՝ Իզաբել Սահակյան

Աղբյուր` Փաստինֆո