Փաստ ինֆո

Երևանի ընդհանուր իրավասության դատարանի դատավոր Դավիթ Հարությունյանը կշարունակի քննել ԲԴԽ նախագահ (լիազորությունները ժամանակավորապես կասեցված են) Ռուբեն Վարդազարյանին մեղադրանք առաջադրելու որոշման դեմ բողոքը՝ ընդ որում դռնբաց դատական նիստում։ «Փաստինֆո»-ի հաղորդմամբ՝ քրեական գործով քննիչը և դատախազը միջնորդություններ են ներկայացրել դատարան՝ դատավոր Դավիթ Հարությունյանին ինքնաբացարկ հայտնելու վերաբերյալ՝ փորձելով դատավորին հեռացնել վարույթից, իսկ թե ինչ հիմքեր են մատնանշել իրավապահները՝ այս պահին դեռևս հայտնի չեն, քանի որ միջնորդությունը քննվել է դռնփակ նիստում։ Պաշտպանության կողմը ներկայացրել է առարկությունները՝ ներկայացված միջնորդությունների վերաբերյալ։ Միևնույն ժամանակ հարկ է արձանագրել, որ դատավոր Հարությունյանը համարվում է ամենաբարձր վարկանիշն ունեցող և հեղինակավոր դատավորներից մեկը, ով հայտնի է իր անկախությամբ և ում կողմից կայացված ակտերը, սովորաբար, չեն բեկանվում վերադաս ատյանների կողմից։ Դատավոր Դավիթ Հարությունյանի վարկանիշը մայիսի 14-ի դրությամբ՝ 82 միավոր է։ 

Երևանի ընդհանուր իրավասության դատարանը՝ դատավոր Դավիթ Հարությունյանի նախագահությամբ, վերադառնալով խորհրդակցական սենյակից՝ որոշում է կայացրել միջնորդությունները մերժելու մասին։ Միաժամանակ բավարարել է բողոքը դռնբաց քննելու մասին միջնորդությունը ու այժմ նիստը շարունակվում է դռնբաց։

Ինչպես արդեն տեղեկացրել ենք՝ ՀՀ ԲԴԽ նախագահ Ռուբեն Վարդազարյանին ՀՔԾ-ում մեղադրանք է առաջադրվել՝ ՀՀ քրեական օրենսգրքի 332-րդ հոդվածի 3-րդ մասի՝ պաշտոնեական դիրքն օգտագործելով արդարադատության իրականացմանը խոչընդոտելու հատկանիշներով, նրա նկատմամբ որպես խափանման միջոց է կիրառվել ստորագրությունը՝ չհեռանալու մասին։ Վարդազարյանի դեմ քրեական գործ է հարուցվել՝ առանց նրա անձեռնմխելիության հաղթահարման՝ նախկին դատավոր, ԱԱԾ տնօրենի նորանշանակ տեղակալ Անդրանիկ Սիմոնյանի հաղորդման հիման վրա։

Նկատենք, որ թեև ՀՀ գլխավոր դատախազությունը հայտարարել էր, թե Ռուբեն Վարդազարյանի գործառութային անձեռնմխելիության հաղթահարման խնդիր չկար, քանի որ քրեական հետապնդումը չի վերաբերում դատավորի կողմից իր լիազորությունների իրականացմանը։ Անգամ նախկին զինդատախազ Գագիկ Ջհանգիրյանի հանձնարարությամբ պատրաստված ԲԴԽ հաղորդագրության մեջ նշվել էր, թե Ռուբեն Վարդազարյանի նկատմամբ քրեական հետապնդումն իրականացվում է ոչ իր լիազորությունների իրականացման կապակցությամբ, սակայն փաստն այն է, որ քրեական գործը հարուցվել է պաշտոնեական դիրքի օգտագործմամբ արդարադատության իրականացմանը խոչընդոտելու հատկանիշներով։

Հիշեցնենք, որ Ռուբեն Վարդազարյանի դեմ հետապնդումներն սկսվել են 2020 թվականի նոյեմբերի 15-ի հայտարարությունից հետո, երբ դատավորներին կոչ արեց հավատարիմ մնալ ժողովրդի առջև տված երդմանը և զերծ մնալ բոլոր տեսակի քաղաքական ճնշումներից և ազդեցություններից։

Ճնշումները նոր թափ հավաքեցին, երբ դատարաններն ուղղակի սկսեցին չդակել քաղաքական գործերով նախաքննական մարմնի ապօրինի մեղադրանքները՝ արձանագրելով դրանց ապօրինի լինելը։

Իշխանությունները նախ փորձեցին Վարդազարյանի նկատմամբ ճնշումը խստացնել կնոջ միջոցով՝ վերջինիս հրավիրելով հարցաքննության ՀՔԾ, ապա արդեն ԱԱԾ տնօրենի տեղակալի միջոցով գործ հարուցվեց անձամբ Վարդազարյանի դեմ։ Ընդ որում՝ ըստ շրջանառվող տեղեկատվության, Անդրանիկ Սիմոնյանը Լոռու մարզի դատավորից ԱԱԾ տնօրենի տեղակալ է նշանակվել հենց այդ պայմանով, որ ցուցմունք կտա ընդդեմ Ռ. Վարդազարյանի։ Այս տեղեկատվությունը, թեեւ արդեն վաղուց է շրջանառվում, սակայն պաշտոնական աղբյուրները չեն հերքել։

Հեղինակ՝ Իզաբել Սահակյան

Աղբյուր` Փաստինֆո