Փաստ ինֆո

Երբ երկու շաբաթ առաջ հարց էի բարձրացնում սահմանների կահավորման մասին, վարչապետից ստացա հեգնական պատասխան, թե ինչ- որ պետք է արվում է և լավ է, որ դու և ադրբեջանցիները չեք տեսում։ Հիմա լա՞վ է, որ ադրբեջանցիներն ուրիշ բաներ են տեսնում արդեն։ Այս մասին ԱԺ-ում հայտարարեց ԱԺ պատգամավոր Թագուհի Թովմասյանը։

Ինչ վերաբերում է ԱԺ-ում հնչած միասնականության վերաբերյալ ելույթներին, Թովմասյանը նշեց, թե ու՞մ հետ պետք է լինել միասնական. «Դուք այս օրերին, երբ իմ հայրենիքը մի քանի կիլոմետրով էլի է փոքրացել, Ադրբեջանն առաջ է եկել, շարունակում եք հայտարարություններ տարածել, թե պատգամավորի տված հարցի արդյունքում ադրբեջանցիները հարձակվեցին։ Լու՞րջ եք ասում, սա ինչ դիսկուրս է ընդհանրապես։ Դուք հասկանու՞մ եք ուր ենք գնում, հասկանու՞մ եք մեր երկրի հետ ինչ է կատարվում և ինչպես կարելի է այսօրվա երկխոսությունը ծավալել այս տիրույթում»։

Թովմասյանի խոսքով՝ եթե այսօր որևէ բան ունենք խոսելու, դա միջազգային հանրության հետ խոսելն է՝ բանակցությունների միջոցով, որ ազերիները հետ գնան և վայն էն է, որ հանկարծ կարողացանք թույլ տալ, որ Ադրբեջանը կարողանա մարսել այսօրվա ոտնձգությունը՝ ՀՀ սուվերեն պետության նկատմամբ, եթե մարսեցին՝ շատ ավելի վատ է լինելու։

Անդրադառնալով պաշտոնական ստերին՝ Թովմասյանը հորդորեց չստել, երբ որևէ բան է կատարվում, մարդիկ անզեն աչքով տեսնում են՝ ադրբեջանցիները գալիս են՝ քայլելով, ոտքով, միացնում ենք հեռուստացույցը, համացանցում ենք նայում, պաշտոնապես՝ հերքում են, թե մոլորյալներ են, չկա նման բան, ինչու՞ ենք խաբում եղած փաստերը։ Թովմասյանի այս հայտարարությանն արձագանքեց իշխանական պատգամավորներից մեկը՝ նշելով, թե ոչ մեկը նման բան չի ասել, ինչին ի պատասխան Թովմասյանը նշեց. «Ասվել է։ Մարզպետներն են ասել։ Դուք եք ստում և ես փաստերով ասում եմ, որ ստել են, ասել են, որ չի եղել խախտում։ Մինչև վարչապետի ԱԽ նիստի ժամանակ արված հայտարարությունը հերքվել է, որ ՀՀ տարածք են մտել։ Մյուս անգամ չխանգարեք, երբ խոսում եմ»։

Բացի դա՝ Թովմասյանը մտահոգություն հայտնեց նաև առ այն, որ Գեղարքունիքի մարզում չունենք ռուսական որևէ ներկայացվածություն, Կութ համայնքից կա ահազանգ, որ մարդիկ անզեն կանգնած են եղել և նայել, թե ինչպես են ադրբեջանցիները մտնում հայկական տարածք։

«Գոնե հովիվներին տրամադրենք զենքեր, որ ինքնապաշտպանվեն։ Մարդիկ չեն կարողանում իրենց անասուններն ապահով արածացնել։ Իհարկե, նրանցից որևէ մեկը համարձակության խնդիր չունի, ասում են՝ առանց զենքի էլ կպտտվենք և թույլ չենք տա, որ մեզ այնքան մոտ գան , որ վտանգն ավել մեծ լինի, բայց կարծում եմ, որ ՀՀ-ն պետք է տեր կանգնի ՀՀ յուրաքանչյուր քաղաքացու»,- նշեց նա։

Աղբյուր` Փաստինֆո