Փաստ ինֆո

Ադրբեջանը չի հանդարտվելու, եթե տեսնի, որ այս դեպքը հանդուրժվում է, թե մեր, թե ՀԱՊԿ-ի կողմից, հետեւաբար բոլորի գործողությունները պետք է լինեն միանշանակ եւ աներկբա,- այսօր տեղի ունեցած մամուլի ասուլիսում հայտարարել է ՀՀ ԱԺ «Լուսավոր Հայաստան» խմբակցության ղեկավար Էդմոն Մարուքյանը։

Նա արձանագրել է, որ ադրբեջանական կողմը խախտել է ՀՀ պետական սահմանը, մեր երկրի օրենսդրությունը, տարածքային ամբողջականությունը և հայտնվել մի վայրում, որտեղ չպետք է հայտնվեր:

«Հենց սահմանը հատելու ժամանակ պետք է կանխվեր դա և հարված հասցվեր հակառակորդին»,- նշել է պատգամավորը՝ ավելացնելով, որ մերոնք իրականում ադրբեջանցիների առաջխաղաղացման մասին իմացել են ավելի ուշ, երբ արդեն դիրքավորվել էին։ Պատճառն այն է, որ սահմանագիծն ամբողջությամբ չի վերահսկվում մեր ԶՈՒ կողմից, զորք չունենք տեղակայված։

«Եթե Ադրբեջանը բանակցությունների արդյունքում չի զիջում, ապա հայկական կողմը լեգիտիմ իրավունք ունի կիրառել իր ձեռքի տակ եղած գործիքները, այդ թվում ՝ուժ կիրառել»,- ընդգծել է Էդ. Մարուքյանը։
Նա ճիշտ է գնահատել պաշտոնական Երեւանի կողմից այս պահին կիրառվող միջոցները, որոնք սպառվելու դեպքում ՝ կմնա ուժի կիրառումը։

Մարուքյանը նաև նշեց, որ սահմանային տարբեր տեղերում Ադրբեջանը զորք չունի տեղակայված և հայկական կողմը ևս կարող է մտնել հակառակորդի տարածք, սակայն Հայաստանը հետևում է եռակողմ համաձայնագրի կետերի պահպանմանը։
«Երբ Հայաստանը իրեն պահում է միջազգային իրավունքին և եռակողմ համաձայնագրին համահունչ, սա չպետք է դառնա Ադրբեջանի կողմից նոր սադրանքների առարկա: Նոյեմբերի 9-ի համաձայնագրով հստակ նշված է, որ զորքերը, որտեղ կանգնած են, այնտեղ էլ պետք է մնան, բայց դրանից հետո ադրբեջանական զորքերը անընդհատ տեղաշարժվում են դեպի ՀՀ տարածք, այսինքն՝ եռակողմ համաձայնագիրն անընդհատ ոտնահարվում է Ադրբեջանի կողմից»,-ասել է Մարուքյանը:

Աղբյուր` Փաստինֆո