Փաստ ինֆո

Սյունիքում իրավիճակը նույնն է, հակառակորդը հետ չի նահանջում, դիրքավորվել են: Դեռևս բանակցություններ են ընթանում: Այս մասին «Փաստինֆո»-ի հետ զրույցում ասաց Սյունիք նախկին մարզպետ Վահե Հակոբյանը՝ նշելով, որ ադրբեջանցիները դիրքեր են փորել, խրամատավորվել, վրաններ են տեղադրել Վերիշեն գյուղի գլխին։

«Մեր սահմանից առնվազն 4 կմ առաջ են անցել, երեք ուղղություններով են տեղավորվել՝ դեպի Գորիս, դեպի Սիսիան, դեպի Ջերմուկ: Իմ տեղեկություններով՝ մեր կողմից բանակցում են Զինված ուժերի ներկայացուցիչները , Գորիսի քաղաքապետը, բայց սա քաղաքապետի լուծելու հարցը չի, Սյունիքի մարզպետն էլ սկզբում ասում էր տեղյակ չեմ, հետո ասեց մոլորվել են, հետո էլ ասում է նման բան չեմ ասել, իմ տրամաբանության մեջ չի տեղավորվում այս ամենը»,-ասաց Սյունիքի նախկին մարզպետը:

Արդեն երկրորդ օրն է, ինչ հակառակորդը խախտել է մեր տարածքային ամբողջականությունը՝ ինչպես է գնահատում մեր երկրի ռազմաքաղաքական ղեկավարության արձագանքն ու ձեռնարկված քայլերը՝ «Փաստինֆո»-ի հարցին ի պատասխան Սյունիքի նախկին մարզպետն արձագանքեց՝ վախկոտ.

«Ոչ մի կառույց չի աշխատում, երկրի նախագահն ինչու՞ ձայն չի հանում, ինչու՞ գլխավոր դատախազը ձայն չի հանում մեր երկրի սուվերեն տարածքի նկատմամբ ոտնձգություն կատարելու փաստով, պետական սահմանը հատելու վերաբերյալ քրգործ պետք է հարուցվի առնվազն։

Պետք է դիմեին ՀԱՊԿ, տեղեկացնեին՝ ինչ է կատարվում: Ադրբեջանցիները ռազմական գործողություն չեն անում, բայց սահման հատելն արդեն ոտնձգություն է մեր երկրի նկատմամբ: Այս անգամ խոսքը Արցախի հարակից տարածքի մասին չէ, այլ կոնկրետ ՀՀ տարածքի»,-ասաց զրուցակիցը՝ ավելացնելով՝ « այս ամենից հետո Նիկոլին հարկավոր է 14 ժամ ժամանակ, որպեսզի հասկանա՝ ի՞նչ է կատարվում և երեկոյան ԱԽ նիստ գումարի, հակառակորդը լուսադեմից՝ ժամը 4-ից արդեն դիրքավորված է, իսկ Փաշինյանը ԱԽ նիստ է անում ուշ երեկոյան, բայց այդպես էլ չեն կարողանում հասկանալ, ի՞նչ պետք է անեն»,-ասաց Հակոբյանը:

Սյունիքի նախկին մարզպետը պնդեց՝ կամ պետք է գերեվարեին ՀՀ տարածք ներխուժած ադրբեջանցիներին և փոխանակեին մեր գերիների հետ, կամ էլ ոչնչացնեին նրանց:

Իսկ թե ինչո՞ւ չգերեվարեցին ՀՀ տարածք մտած ադրբեջանցի զինվորականներին, զրուցակիցն ասաց՝

«Որովհետև մեր իշխանությունը քաղաքական իմպոտենտների իշխանություն է: Տեռորիստի հոդվածով պետք է հարուցեին քրգործ՝ նրանց նկատմամբ: Առավոտից ասում էինք՝ Սյունիքում կա լրջագույն խնդիր, ադրբեջանցիները ներխուժել են մեր տարածք, իսկ Փաշինյանի ածանցյալ պատգամավորները ասում էին՝ նման բան չկա, ապատեղեկատվություն է, պանիկա են տարածում, մինչև հետո Փաշինյանը հայտարարում է, որ իսկապես խնդիր կա և ասում է այն, ինչ մենք բարձրաձայնում էինք»,-ասաց Վահե Հակոբյանը:

Նա չբացառեց, որ ստեղծված իրավիճակով պայմանավորված երկրում ռազմական դրություն հայտարարի և առաջիկա արտահերթ ընտրությունները չեղարկվեն.

«Նիկոլ Փաշինյանը և Ադրբեջանի նախագահը հանցավոր համաձայնության են եկել, պրովոկացիա են ուզում անել, որը հնարավորություն կտա երկրում ռազմական դրություն հայտարարելու և ընտրությունները չեղարկելու, քանի որ ակնհայտ է, որ իրենք չեն վերարտադրվելու»,-ասաց Սյունիքի նախկին մարզպետը:

Աղբյուր` Փաստինֆո