Փաստ ինֆո

Ադրբեջանցիները Վարդենիսի հարակից տարածքներում դիրքավորվել են սարերի վրա, չեն նահանջում ու հստակ չէ՝ ո՞վ է բանակցում և ինչո՞ւ են սահմանախախտները մինչև հիմա ՀՀ սուվերեն տարածքում։

«Իրենք մեծ քանակով են, ուրալներով գալիս են, դիրքավորվում են, իսկ մենք բնականաբար ավելի սակավաթիվ ենք»,- «Փաստինֆո»-ի հետ զրույցում ասել է ՀՀ ԱԺ անկախ պատգամավոր Թագուհի Թովմասյանը՝ ներկայացնելով ադրբեջանական ագրեսիայի մանրամասները։

Հիշեցնենք, որ այսօր ՀՀ ՊՆ-ն հայտարարել է, որ Ադրբեջանը հերթական սադրանքն է իրականացրել Հայաստանի Հանրապետության ինքնիշխան տարածքի նկատմամբ՝ փորձելով դիրքային առաջխաղացում ապահովել Վարդենիսի և Սիսիանի սահմանային հատվածներում

«Խոսքը ոչ թե Վարդենիս համայնքի, այլ կից բնակավայրերի՝ Վերին Շորժա, Կութ բնակավայրերի մասին է, որտեղ այսօր առավոտից Ադրբեջանը փորձել է դիրքերն ամրապնդել ոչ այն տեղերում, որտեղ նախնական իրենք դիրքավորվել էին նոյեմբերի 9-ի հայտարարությունից հետո»,- ասաց պատգամավորը։

Ըստ Թովմասյանի՝ ադրբեջանցիները դիրքավորվել են սարի վրա, որը գյուղացիներն օգտագործում էին որպես արոտ։ Դիրքավորվել և չեն նահանջել։ Պատգամավորն ասում է՝ ամեն վայրկյան իրավիճակ է փոխվում։

«Մոտեցել են ուղղակի մեր սարերին։ Վարդենիսի սարի վրա, որը մշտապես եղել է մեր բնակավայրերի համար արոտատեղի, հիմա իրենք դիրքավորվել են, ինչը ռազմավարական առումով նաև վտանգավոր է, որովհետև բավականին բարձրադիր հատված է և նրանց տեսադաշտում շատ ավելի լայն բնակավայրեր են ընդգրկվում»։

Ըստ նրա՝ ադրբեջանցիները հայկական տարածքում դիրքավորվել են՝ առանց որեւէ կրակոց արձակելու։

«Իրենք գալիս են և ասում՝ սա մեր տարածքն է և մենք պետք է դիրքավորվենք այս հատվածներում և չկա որևէ կողմ, որը կդիմադրի, կդիմակայի, կասի ՝ չեք կարող, սա մերն է։ Ինչ- որ բանակցություններ են ընթանում, բայց չեմ հասկանում բանակցությունները ո՞ւմ միջև է ընթանում և ովքեր են մեր կողմից բանակցողները»։

Պատգամավորը չի ընդունում այն գործելաոճը, որով ադրբեջանական կողմը ներխուժում է ՀՀ տարածք, առաջխաղացում է փորձում ապահովել, իսկ մենք նրանց հետ բանակցում ենք։

«Իրենք ներխուժում են, ՀՀ պետական սահմանն են անցնում՝ Սյունիքի դեպքում 3,5 կմ, ուրեմն անհապաղ պետք է գերեվարվեն, քրեական պատասխանատվության ենթարկվեն։ Դատախազությունը խրոխտ հայտարարում է, որ սահմանային խախտման միջադեպերը խորը քրեաիրավական գնահատականի կարժանանան, իսկ ինչո՞ւ արդեն չեն արժանացել։ Ինչու այդ սահմանախախտները չեն պատժվել ՀՀ օրենքով»,- ասել է պատգամավորը։

«Եղբայր, ՀՀ սուվերեն տարածք են մտել, մենք նրանց չե՞նք պատժում, բանակցո՞ւմ ենք, ինչպես կարելի է բանակցել դիվերսանտի հետ»,- հայտարարել է Թովմասյանը։

Աղբյուր` Փաստինֆո