Փաստ ինֆո

Սև լիճն ամբողջությամբ թշնամու վերահսկողության ներքո է։ Բանակցություններն անարդյունք են անցել։ «Փաստինֆո»-ի հետ զրույցի ժամանակ այս մասին ասաց Գորիսի փոխքաղաքապետ Մենուա Հովսեփյանը՝ հավելելով, որ այս պահին էլ բանակցությունները դեռ շարունակվում են։

Հայկական կողմից բանակցում են առաջին բանակային կորպուրսը, սահմանապահ զորքերը։ Փոխքաղաքապետի խոսքով ոչ մի պաշտոնյա բանակցային գործընթացին չի մասնակցում, քանի որ հարցը զինվորականների տիրույթում է։

Մենուա Հովսեփյանը նշեց, որ դրանք լուրջ բարձունքներ են. «Այն բարձունքները, որոնք այս պահին զբաղեցնում են, այդտեղից և՛ Գորիսն է երևում, մյուս կողմում՝ Որոտանի հատվածում իրենց զորքն է դիտարկում։ Բարձունքը ռազմավարական է։ Բացի այդ Սև լիճը ոռոգման նպատակով էլ է օգտագործվում։ Ամեն ինչ այդ ջրամբարից է սնվում և այս պահին դա մերը չէ, նրանց հսկողության տակ է»,-ասաց Գորիսի փոխքաղաքապետը՝ հորդորելով սպասել բանակցությունների ընթացքին ու արդյունքին։

Հարցին՝ եթե բանակցությունների արդյունքում չհաջողվի հակառակորդին հետ ուղարկել, ի՞նչ կլինի, Գորիսի փոխքաղաքապետն ասաց.

«Սյունեցին պատրաստ է ցանկացած զարգացման, նույնիսկ ամենավատը, որ կարող է լինել»։

Ինչպես արդեն տեղեկացրել ենք՝ երեկ առավոտյան հակառակորդը միանգամից երկու ուղղությամբ տեղաշարժել է իր դիրքերը։ Եթե Գեղարքունիքի մոտ ադրբեջանցիները դիրքերը տեղաշարժել են իրենց հսկողության տակ գտնվող տարածքում՝ դրանք մոտեցնելով ՀՀ սահմանին, ապա Սյունիքի հատվածում մուտք են գործել ՀՀ տարածք։ Հակառակորդն առաջացել է Իշխանասարի ուղղությամբ։

Աղբյուր` Փաստինֆո