Փաստ ինֆո

Սահմանագծի փոփոխությունից հետո կան վայրեր, որտեղ բնակլիմայական պայմանները և ռելիեֆը շատ բարդ է, որոշ հատվածներում հակառակորդը տեղակայման պրոցես չէր արել, հիմա եղանակային պայմանները փոխվել են, տեղակայման պրոցես են անում, մեր Զինված ուժերն էլ հետևում է, որպեսզի իրենք իրենց տեղակայման վայրերից առաջ չգան: Այս մասին այսօր լրագրողների հետ զրույցում ասաց Գեղարքունիքի մարզպետ Գնել Սանոսյանը:

Մարզպետը վստահեցրեց, որ ՀՀ պետական սահմանին որևէ խախտում չի եղել.
«Հայաստանի պետական սահմանը պահպանվել է, ընդամենը մեկ-երկու տեղ լանջով սահմանագիծ կար, որը մերոնք պնդում էին, որ պետք է այդ հատվածից մի քիչ ներս պետք է նստեն, որն ընթացքում կարգավորվեց: Հիմա սահմանագծով մերոնք էլ, իրենք էլ նստած են»,-ասաց Սանոսյանը:
Մարզպետը վստահեցրեց, որ Գեղարքունիքում լարվածություն չկա, իսկ անհանգստությունը տարածվող կեղծ տեղեկությունների հետևանքով է լինում.

«Երեկ ես մի քանի ժամ եղել եմ Վերին Շորժայում, եղել եմ այն հատվածում, որտեղ այդ աշխատանքներն են, և մեր Զինված ուժերը ներկա են, աշխատում են, քարտեզները կան, սա այն նույն պրոցեսն է, որը կար նոյեմբեր–դեկտեմբեր ամիսներին: Բնակիչները տեսել են, որ վիճակը հանգիստ է, երեկ բնակիչներից շատ մարդ կար մեզ հետ, այնտեղ որևէ արտառոց բան տեղի չի ունեցել, ընդամենը բանակցում են իրար հետ՝ սահմանագիծը ճշգրտում են»,-ասաց Գնել Սանոսյանը:

Աղբյուր` Փաստինֆո