Փաստ ինֆո

Ադրբեջանցիների կողմից հայ հովվի նկատմամբ ՀՀ տարածքում կատարված ոտնձգության դեպքի առթիվ ՀՀ ոստիկանության կողմից քրեական գործի հարուցումը մերժելը մարդու իրավունքների կոպիտ խախտում է։ Ավելին՝ վտանգ է ստեղծում , որ բռնությունը հայ քաղաքացիների նկատմամբ ադրբեջանցիների կողմից կարող է շարունակական լինել: Այս մասին «Փաստինֆո»-ի հետ զրույցում ասաց ՀՀ առաջին ՄԻՊ Լարիսա Ալավերդյանը:

Հիշեցնենք, որ Սյունիքի մարզի Արավուս համայնքի հովվին ադրբեջանցիները փորձել են առևանգել, բռնություն գործադրել նրա նկատմամբ, հարվածել աչքին։

«Ութ հոգի էին։ Ավտոմատներով էին, չէի ենթարկվում, որ ինձ տանեն խրամատի մեջ։ Ասում էին հողը մերն ա, պրծավ։ Եթե ես չպաշտպանվեի, ինձ տանելու էին ուղիղ խրամատ։ Իրանց կամանդիրը ադրբեջաներեն ասում է արի այստեղ, ես ասում եմ չեմ գալիս, չեմ ենթարկվում։ Մեր տղերքն էլ, ջիգյարները ուտեմ, իմ կյանքը փրկեցին»,- «Փաստինֆո»-ին պատմել էր հովիվ Ֆելիքս Ավագյանը՝ նշելով, որ ադրբեջանցիները սպառնացել էին իրեն Բաքու տանել։

Մամուլի հետեւողական բարձրաձայնումերից հետո, ի վերջո, ոստիկանությունում նյութեր նախապատրաստվեցին, սակայն այսօր ոստիկանությունը պաշտոնապես տեղեկացրեց, որ քրեական գործի հարուցումը մերժվել է ՀՀ քրեական դատավարության օրենսգրքի 35-րդ հոդվածի 1-ին մասի 2-րդ կետի՝ հանցակազմի բացակայության հիմքով։ Այսինքն՝ մեր հովիվին առեւանգելու փորձ կատարած ադրբեջանցիների արարքում ՀՀ ոստիկանությունը հանցակազմ չի գտել։

ՀՀ առաջին ՄԻՊ, տիկին Ալավերդյանի գնահատմամբ՝ այն, ինչ տեղի է ունեցել հովվի հետ, մարդու իրավունքների կոպտագույն խախտում է, մարդու անձեռնմխելիության իրավունքի ոտնահարում է տեղի ունեցել՝ նրան ծանր հոգեբանական իրավիճակի մեջ գցելով և ֆիզիկական բռնություն գործադրելու պայմաններում:

«ՀՀ Քրեական օրենսգիրքն ունի հատուկ մասն ունի առանձին գլուխ ` անձի դեմ ուղղված հանցագործությունների վերաբերյալ: Բացի դրանից, գոյություն ունի 119-րդ հոդվածը, որը պատիժ է նախատեսում մարդուն ֆիզիկական ուժեղ ցավ եւ հոգեկան ուժեղ տառապանք պատճառելու համար: Քանի որ խոսքը գնում է քրեական գործի մասին, այդ դեպքում անգամ առանց այդ մարդու հայտարարության էլ անհրաժեշտ է հարուցել քրեական գործ: Եթե քրեական գործը չի հարուցվել, դա մեր իրավական մարմինների կողմից մարդու իրավունքների կոպիտ ոտնահարում է»,- ընդգծել է Ալավերդյանը:

ՀՀ առաջին ՄԻՊ-ը շեշտեց, որ մեծ վտանգ կա, որ այսպիսի դեպքերը շարունակական կլինեն:

«Տվյալ դեպքում, իրավական մարմինների անգործությունը վտանգի տակ է դնում ընդհանրապես այնտեղ ապրող բնակիչների անձեռնմխելիությունը, կյանքի և աշխատանքի իրավունքը և մի շարք այլ իրավունքներ: Անգործությունը անգամ մեկ դեպքում, տվյալ պարագայում` ազգային անվտանգության հանդեպ անտարբերություն է:

Ես հուսով եմ, որ կգտնվեն իրավապաշտպաններ, որոնք գրագետ կվարեն այս գործը և կհասնեն նրան, որ քրեական գործ կհարուցվի: Այս գործը անգամ պետք է հասնի Եվրոպական դատարան»,- շեշտել է Ալավերդյանը:

Հեղինակ՝ Անի Մշեցյան

Աղբյուր` Փաստինֆո