Փաստ ինֆո

Քաղաքական այն ուժը, որը 2018-ի մայիսից արդեն երեք տարի իշխում է Հայաստանում, առաջիկա արտահերթ ընտրություններին մասնակցության հայտ է ներկայացնում՝ «Կա՛ ապագա» կարգախոսով, սակայն իշխանության գալուց ի վեր մինչ օրս ապագայի մասին որևէ խոսակցություն նրանցից չենք լսել։

Նրանց հիմնական խոսակցությունը՝ կառուցված է եղել նախկինների, այսինքն՝ անցյալի վրա։ Ո՛չ նույնիսկ ներկայի, որի առանցքում իրենք են, այլ՝ անցյալի, որը մերժելով իշխանության են եկել։ Մինչդեռ՝ նրանց հիմնական անելիքը պիտի լիներ իրենց ծրագրերի վրա կենտրոնանալը, ինչը այդպես էլ չստացվեց։

Բնական հարց է ծագում՝ ինչու՞, չէ՞ որ իշխանության ղեկին հայտնվածները երիտասարդ էին, թվում էր՝ գործունյա, ակտիվ և կրեատիվ, պիտի որ ունենային իրենց տեսլականը, ծրագրերը։ Ավաղ, իշխանությունը նրանց հեշտորեն զիջվեց՝ և օտար ուժերի մատն էր խառը․․․և իրենք էին՝ օտարի հպատակ․․․

2018-ին փողոցը լցված էր նախորդ իշխանությանը մերժողներով, սակայն այդ փողոցը մերժելուց զատ՝ ռացիոնալ առաջարկ չուներ։ Չուներ, քանի որ փողոցի առաջնորդը հընթացս հայտնվելով իրադարձությունների կիզակետում՝ պետություն ղեկավարելու ո՛չ փորձ ուներ, ո՛չ տեսլական, և անկեղծ լինենք, ո՛չ էլ՝ ցանկություն։

Դրածո էր։ Դրածոն իր անփառունակ 3 տարին գլորեց նախկինների ստեղծածը մսխելով և՝ նրանց շուքի հետ կռիվ տալով։ ՈՒ փաստորեն, այնքան ամուր էին հիմքերը, որ մինչ օրս դեռ չի հաջողվել ամբողջությամբ քանդել-ավերել։ Դեռ պայքարող օղակներ կան։

Հիշու՞մ եք՝ Մոխրոտիկի կոշիկը, որի մեջ խորթ մոր աղջիկներն այդպես էլ չկարողացան խցկել իրենց ոտքերը․․․ճիշտ այդպես էլ՝ ապագայի մասին կարգախոսը յուրացրել, բայցև՝ ապագայի ասելիք չունեն, շփոթահար, մոլորվել-մնացել են քայլող ուսապարկերն ու ուսապարկի տերը։

Իրենք էլ գիտեն՝ մահաբեր են՝ Եռաբլուրի՝ ամեն Աստծո օր դեռ ստվարացող եռագույնները՝ վկա։ Սա մեր ներկա կյանքն է՝ թավշյա հեղափոխության առաջնորդի բերածը։

Ո՞րն է լինելու ապագայի մասին նրա ասելիքը։ Արդեն պարզ է՝ չի կարողանալու ձերբազատվել «նախկինների» դեմ երևակայական սուր ճոճելուց։ Չեղած-չարածը՝ որպես գործ ներկայացնելուց։ ՈՒ բոլորն՝ աննախադեպ։ Ասենք՝ պակա՞ս գործ է՝ աննախադեպ հարկեր հավաքելը, Սևանի մակարդակն աննախադեպ բարձրացնելը, կամ՝ գյուղական համայնքներում աննախադեպ երկարության ասֆալտ փռելը։ Էլ չասած՝ այնքան տգետ են, որ ասֆալտ փռելն իրենց համար ճանապարհ կառուցելն է։

Ախր, դուք ու՜ր, ճանապարհ կառուցելն ու՜ր։ Ձերը մենակ փռելն է՝ ասֆալտ փռելն ու ասֆալտին փռելը։ Այդ է ձեր անցյալը, ներկան, իսկ ձեր իսկ փռած ասֆալտին բերանքսիվայր փռվելը՝ 40 օր անց՝ ձեր՝ ապագան։ Մեղմ ասած։

Աղբյուր` Փաստինֆո