Փաստ ինֆո

Ադրբեջանցիների կողմից Արավուս համայնքի հովիվի նկատմամբ բռնություն գործադրելու դեպքի առթիվ քրեական գործ չի հարուցվի։ ՀՀ ոստիկանության հասարակայնության հետ կապերի և լրատվության վարչությունից «Փաստինֆո»-ի հարցին ի պատասխան հայտնեցին, որ Գորիսի բաժանմունքում նախապատրաստված նյութերի հիման վրա որոշում է կայացվել քրեական գործի հարուցումը մերժելու մասին՝ ՀՀ քրեական դատավարության օրենսգրքի 35-րդ հոդվածի 1-ին մասի 2-րդ կետի՝ հանցակազմի բացակայության հիմքով։

Քրեական գործի հարուցումը մերժելու մասին որոշումը ոստիկանությունն ուղարկել է ՀՀ դատախազություն՝ դրա օրինականությունը ստուգելու նպատակով։

Հիշեցնենք, որ Սյունիքի մարզի Արավուս համայնքի հովվին ադրբեջանցիները փորձել են առևանգել, բռնություն գործադրել նրա նկատմամբ, հարվածել աչքին։

«Ութ հոգի էին։ Ավտոմատներով էին, չէի ենթարկվում, որ ինձ տանեն խրամատի մեջ։ Ասում էին հողը մերն ա, պրծավ։ Եթե ես չպաշտպանվեի, ինձ տանելու էին ուղիղ խրամատ։ Իրանց կամանդիրը ադրբեջաներեն ասում է արի այստեղ, ես ասում եմ չեմ գալիս, չեմ ենթարկվում։ Մեր տղերքն էլ, ջիգյարները ուտեմ, իմ կյանքը փրկեցին։ Նոր իրենց կամանդիրը եկել ա ասում է քինացեք, հետո ես դուրս եմ եկել»,- «Փաստինֆո»-ին պատմել էր հովիվ Ֆելիքս Ավագյանը՝ նշելով, որ ադրբեջանցիները սպառնացել էին իրեն Բաքու տանել։

Միջադեպին արձագանքել է նաեւ ՀՀ ՄԻՊ Արման Թաթոյանը՝ արձանագրելով, որ ադրբեջանցի զինծառայողների իրականացրածը հանցավոր ոտնձգություն է ՀՀ սահմանային բնակչի նկատմամբ: «Տեղի ունեցածն ակնհայտորեն հաստատում է ՀՀ քաղաքացիների՝ Սահմանադրությամբ և միջազգայնորեն երաշխավորված իրավունքների կոպիտ խախտումները: Խոսքը վերաբերում է մարդկանց կյանքի, ֆիզիկական և հոգեկան անձեռնմխելիության, սեփականության և կենսական կարևորության այլ իրավունքների մասին, իսկ կյանքի իրավունքի դեպքում՝ խախտման իրական վտանգի մասին:

ՄԻՊ կողմից տարածված վերոգրյալ հաղորդագրությունը դատախազությունն ուղարկել է ոստիկանություն՝ նյութեր նախապատրաստելու։

Դեպքից մոտ 10 օր անց Ֆ.Ավագյանը չէր հրավիրվել ոստիկանություն բացատրություն տալու, դատաբժշկական փորձաքննություն չէր նշանակվել։ Ավելին՝ նա դիմել էր Գորիսի բժշկական կենտրոն՝ բուժօգնության, քանի որ դեպքից հետո աչքի հատվածում ցավեր ուներ եւ սեփական միջոցներով իրականացրել բուժումը։ ՀՀ իրավապահներն էլ ուշացած արձագանքով, փաստորեն, արդարացրել են ադրբեջանցիների գործողությունները՝ գտնելով, որ նրանց գործողություններում բացակայում է հանցակազմը։

Իրենք միայն «նագլի ուշունց են տալիս, բայց լյոխ օքեյա». Արավուսցի հովիվը ադրբեջանցիների հարվածներից հետո այսօր Գորիսում էր՝ հետազոտության

Աղբյուր` Փաստինֆո