Փաստ ինֆո

Ցանկացած քաղաքական միավոր, որը կօգտագործի նախկին բառը կամ կփորձի իր ամեն ինչը նախկինների վրա կառուցել, իմ հետաքրքրությունից դուրս կմնա։ «Փաստինֆո»-ի հետ զրույցի ժամանակ այս մասին ասաց քաղաքագետ Թևան Պողոսյանը։

Նախընտրական քարոզարշավի ժամանակ քաղաքագետն ակնկալում է լսել միայն ապագային վերաբերող խոսք։ Թեև դեռևս հստակ չէ՝ քանի կուսակցություն և դաշինք է մասնակցելու արտահերթ խորհրդարանական ընտրություններին, սակայն քաղաքագետը կարծում է, որ 20-ից ավել հայտ կարող է ներկայացվել հունիսի 20-ի ընտրություններին մասնակցելու նպատակով։

Հարցին՝ արդյոք «Քաղաքացիական պայմանագիր» կուսակցությունը դուրս կմնա քաղաքացիների հետաքրքրության դաշտից՝ հաշվի առնելով, որ նրանք շարունակ խոսում են նախկիններից, Թևան Պողոսյանը նկատեց՝ ՔՊ-ի ճակատագիրը պետք է քաղաքական պատասխանատվության դաշտում լիներ։

«Մարդիկ երեք տարի առաջ ստացել էին ամենաբարձր վստահությունը, սակայն որևէ նախընտրական խոստում չեն կատարել։ Ստացել են մեծ Հայաստան, փոխանցում են փոքր Հայաստան։ Իրենց խնդիրը նույնիսկ այն չէ, թե ինչ են ասելու։ Ես ժողովրդավարության կողմնակից եմ, ժողովրդավարություն ասածը միայն ընտրություն չէ, դա քաղաքական պատասխանատվություն է, արժեքների դաշտ։ Դա երեք ճյուղերի բաժանումն է։ Երեք տարվա ընթացքում այս կուսակցությունն ամեն տեղում ունեցել է լծակներ և դրանցից ոչ մեկը չի կարողացել օգտագործել՝ ի շահ Հայաստանի։ Եթե նոյեմբերի 11-ին հրաժարականներ տային, հեռանային և քաղաքական պատասխանատվություն կրեին, դրանից հետո ճգնաժամերը կառավարվեին ու ապագայում ընտրություններ լինեին, այդտեղ միգուցե կասեի, որ մարդիկ քաղաքական պատասխանատվությունը կրել են ու եկել են նորովի իրենց հայտն են ներկայացնում»,-նշեց քաղաքագետը։

Հարցին՝ արդյոք այս պահի դրությամբ ապագայի մասին խոսող քաղաքական ուժ տեսնու՞մ է դաշտում, Թևան Պողոսյանը նշեց, որ ուժերը դեռ հայտերը չեն ներկայացրել, և բոլորն այսօր խոսում են լոզունգային գաղափարներով։

«ՔՊ-ն քաղաքական պատասխանատվություն չի կրել, բայց գրել է՝ ապագա կա։ Մարդիկ նույնիսկ նշում են, որ վախենում են այդ ասածից, քանի որ մինչև հիմա ինչ ասել են, դրա հակառակն է եղել»,-ասաց քաղաքագետը՝ հորդորելով սպասել քաղաքական ուժերի հայտ ներկայացնելուն, որից հետո կկարողանանք դիտարկել յուրաքանչյուր քաղաքական ուժի կազմը, ծրագրերը։

Թևան Պողոսյանը ՔՊ-ին դաշտում չի դիտարկելու, իսկ մյուս քաղաքական ուժերին կլսի և իր քննադատական դատողությունները կանի։

Մասնավորապես պետք է ուշադրություն դարձնել նրանց առաջարկներին ու տեսլականներին. «Եթե նորից անձերի հետևից ընկնենք, նախկին սխալները կկրկնենք։ Չեմ ցանկանում, որ այլևս որևէ նախկին բան կրկնենք»,-հավելեց Թևան Պողոսյանը։

Աղբյուր` Փաստինֆո